財爺預算案一出，可謂怨聲四起，最慘重係過往一班唔多出聲嘅中產階級，皆因佢哋成為苛稅下最慘情嘅一群嘛！既要未來納重稅之餘，就連佢哋一直追捧嘅中價車，響未來新車首次登記稅提高下，亦係最受害一群，喺牽一髮動全身嘅情況下，就連汽車代理商亦備受牽連，皆因早前唔少代理用上預售嘅策略，原本可以睇定有幾多客購買至訂車，可算係明智之舉，殊不知財爺一聲話加車稅，當中好似寶馬部525iA咁，都不過由原來36萬多加到38萬幾，班準買家尚可接受，但諸如訂咗部富豪XC90，又或者保時捷CayenneS咁，前者亞Mark未接觸到佢哋嘅發言人，未知加幅有幾多，但後者定價接近80萬，家陣就有可能調升至接近95萬，相信響咁嘅環境下，會有唔少準買家撻訂都唔定，你話班代理訂咗唔少新貨未到，屆時分分鐘變蟹貨都有可能，財爺今勻嘅如意算盤，重話想響汽車界多收7億進帳，亞Mark睇嚟就會因加得減喇！再者，聽聞今日某大汽車代理會有裁員大行動，亞Mark就覺得班苦主應該向財爺請願，咪等佢逗女為樂得咁開心吖嗱！