Nokia7250上個星期終於都登場，外形比起7210都叫做有啲唔同，而且重有三隻顏色揀㖭，之但係當中隻紫黑色喺網上就俾人同部高達EPYON拍埋一齊睇，睇吓睇吓大家都幾似樣㗎。其實，兩個都係用紫、黑色做主調，又係走硬線條，樣有雷同都唔出奇！
文：羅新基
𠵱家手機影相咁鬼流行，羅新基都好想知邊部影相手機最好賣，同班手機舖Sales傾開，佢哋都話PanasonicGD88同NECN8呢排都最多人搵，而且多數都係二十零歲後生仔。梗係啦，部機咁型又可以威，又可以同女朋友影吓相，𠱁吓女朋友又得，唔怪得咁好賣啦。
呢個禮拜雖然有唔少新機落場，羅新基都問過班手機舖老闆，都只係話銷情一般，重話之前某大牌子部部機都差唔多，買咗新機都唔似換咗新機，搞到啲客都冇換新機Feel，所以今次佢部新機雖然價錢唔係一開就五、六千蚊，但係都係問嘅人多買嘅人少囉！