以前喺澳洲演出肥皂劇嘅HollyValance，上年走咗去英國出碟，話要做KylieMinogue第二喎！雖然大家都話Kylie嘅走紅神話幾難再發生喺第二個人身上，不過Holly仍然樂此不疲，人前人後都擺出一副「Kylie第二」嘅姿態，就早兩日之嘛，Holly去咗意大利表演，無論台風同造型都跟足Kylie！
染咗頭黑髮嘅Holly前日喺意大利聖雷莫歌唱比賽做表演嘉賓，佢連衣着都向Kylie取經，除咗以一身短裙打扮示人外，不時扭腰又扭籮。其實Holly一出道，就已經擺明抄Kylie，當時一頭金髮嘅Holly除咗衣着性感外，跳舞時同啲男dancers又錫又攬，都係學足Kylie嘅，不過相比之下，我羅拉就覺得Kylie索好多！
另一邊廂，自從Kylie早兩日同「法國畢彼特」奧利華馬天尼斯（OlivierMartinez）嘅戀情曝光後，Kylie前男友JamesGooding接受英國小報訪問時，不斷數臭Kylie，又話Kylie淨係識得踩住男人嚟上位，唔放過任何宣傳機會，佢重話Kylie搞到佢吸毒兼變酒鬼，認真賴得就賴！