好多朋友都問愛心大使，日日見咁多淒涼苦主，會唔會搞到自己個人都好唔開心。老實講，大使又冇呢種感覺，反而睇得多咗，會學識更加珍惜自己所擁有嘅。
好似大使近排跟緊嘅內地燒傷母子王平、石瑞個案，就再一次畀大使經歷到乜嘢叫做人間有情。話說石家三口千里迢迢由安徽嚟香港，其間都遇到唔少波折，若果唔係香港一班熱心基督徒，願意無條件咁付出時間、精力同金錢，相信佢哋一家三口唔會咁快可以安頓落嚟，入院接受治療。
話說醫護人員，一向畀人嘅感覺都係冷冰冰，但今次負責照顧王平、石瑞母子嘅醫生同護士，就絕對可以稱得上係「熱情如火」。主診嘅金永強醫生，不分晝夜、盡心盡力咁醫治呢對可憐母子，佢嘅愛心真係毋庸置疑；至於病房內上下員工，都好同情石家嘅遭遇，默默獻出好多職責以外嘅關心，好似護士長每朝都會自掏腰包，為三口子準備「愛心」早餐、護士小姐們驚瑞仔住醫院悶，又特登買大堆玩具送畀佢，即使清潔嘅嬸嬸，人工未必好高，都好慷慨咁捐咗五百蚊畀佢哋，大使聽到都覺得好感動。
大使喺呢度，要特別向上述熱心人士，重有喺上水攔途捐過錢嘅婦人、跑馬地捐贈過飯盒嘅食肆、當然重有寫過慰問卡、捐過善款畀石家嘅《蘋果》讀者致以最崇高嘅敬意。
暖流熱線
電話:29908688
傳真:23702192
電郵:
網址：