上星期唔少股仔受到大市下跌影響回落，搞到小初有心驚驚，所以都沽咗唔少股仔，費事成手都係貨，一旦走唔切就大件事。
小初上周五沽咗今日公布業績嘅勤達集團（1172），小初之前講過隻股最近獲得一位年輕炒家幫手，由唔夠0.40元，升至上周二最高0.51元。不過，高位就出現回吐，上周五再跌4.26%，收0.45元。
由於小初見隻股升咗咁多，所以先沽貨獲利，若今日公布業績理想，話唔定會買番，皆因小初知道嗰位年輕炒家尚未散貨。
講起未散貨，另一隻創業板股同仁堂科技（8069），將於周三公布全年業績。由於呢隻股街貨集中於幾個基金手上，所以長升長有，兼夾屢創新高。
隻股上周五下跌3.69%，收10.45元，仍然算係近期高位。經紀黃話，同仁堂係創業板奇葩，有錢賺又有息派，今次公布業績估計唔差。此外，最緊要係芬佬未散貨，理論上應該穩陣。
慕容小初