菲律賓限制菲傭來港，以抗議特區政府向外傭徵稅，簡直得啖笑。全世界嘅菲傭以香港人工最高，假設二十萬菲傭在港，每人每月滙二千五百港元返菲律賓，一年就為菲律賓創滙六十億港元，即近乎七億七千萬美元，唔係一個小數目；阿羅約夫人政權禁止菲傭來港，最大嘅輸家就係菲律賓，佢哋手上冇牌，又學人作大，直情係紙老虎，都唔知點下台。
阿羅約夫人最近亦都「大」美國政府，拒絕簽署反恐合作協議，即係唔准美國部隊喺菲律賓落手落腳捉恐怖分子或南部回教游擊隊；一反口之後，達沃機場就發生恐怖爆炸，足證菲律賓軍隊根本搞唔掂兼無能。據美國報紙唱衰阿羅約夫人嘅報道，菲律賓軍隊兵賊不分，追擊圍捕回教游擊隊與恐怖分子之時，可以講數，有錢收就可以放人，所以唔鍾意美軍幫手，費事美軍睇住晒，影響財路！有一次美軍用衞星探測與電子截聽科技，知道一批游擊隊躲在廣大叢林內嘅邊一個角落，班齊人馬去襲擊，由菲律賓軍隊去圍捕，游擊隊無一幸免。自此之後，就有政客向阿羅約夫人施壓力，話美國反恐過份熱心，不利菲律賓主權喎。
如此政府，曾蔭權都唔畀面佢。事實上，特區政府一早開始收緊菲傭來港，朋友嘅朋友係入境處官員，兩公婆想請一個菲傭，亦被入境處拒絕申請，其他人相信更不容易。