曼聯隊長堅尼原來好為紅魔球迷個荷包着想，而且重覺得佢發財立品，相比於我哋嘅財爺阿松，更加覺得呢位球壇鐵漢值得尊敬、受球迷愛戴！
話說堅尼已經效力咗曼聯差唔多十年，會方諗住同拒搞番場紀念賽，估計佢可以撈番二百萬鎊，點知佢一口拒絕，話唔想啲曼聯球迷破財入場睇波，總之心領就得嘞。我求大俠知道堅尼曾因為人工同知名度突然暴升，最後搞到要睇心理醫生，𠵱家好番，變得視錢財如糞土。
講到呢度，我求大俠好心噏，堅尼可以咁為支持者着想，但係我哋嘅財爺就……繼「折墮論」之後佢又搞單避稅買靚車醜聞，如果財爺學到堅尼識得為球迷着想，處處看顧市民就好咯，可惜事與願違，難怪香港怨氣沖天。
巴塞隆拿隊長安歷基前日對華拉度列時受傷，又要唞幾個禮拜，我求大俠諗起前排佢復出前，巴塞西甲成績渣到死；復出後就有改善，咁𠵱家佢及又傷嘞，豈不是巴塞又有麻煩？至於拜仁主力波勒亦因足踝傷倦勤六個禮拜，但拜仁因已經喺德甲拋離十三分，冇波勒都冇乜所謂……巴塞同拜仁真係同人唔同命嘞。
伯明翰麻煩友沙維治又嚟料！佢要求維拉前鋒杜布連就上周一用頭撞佢一事道歉，但我求大俠認為件事都過咗成個禮拜咁滯，重攞番嚟講，佢係唔係想畀人再死亡恐嚇過，算把啦！另外，佢話因為曾受過死亡威脅，搞到阿媽哭哭啼啼，老婆又就快生得，博可憐咁，但佢又搞咁多嘢，我求大俠就真係頂佢唔順嘞！
噚日我求大俠先講完意大利聯賽會騎呢，去到上個禮拜五至判羅馬卡斯辛奴第二次上訴得直，可以踢翌日對拉素場波，估唔到佢真係做英雄，完場前頂入幫羅馬攞到一分。最搞嘢係呢位手臂上刻有「安東尼奧」四個字（佢個名）嘅後生仔，喺在場最矮嘅一個，竟然跳贏拉素嘅古圖頂入，後者真係要打屁股。
近期已成為NBA溜隊壞孩子嘅阿達斯，喺噚日個場波又有「新搞作」，就係打到第二節粗暴侵犯拓荒者嘅威爾斯，衰埋呢次，阿達斯就要喺啱啱過去星期日對帝王嗰場波停賽。阿達斯早排先向球隊同球迷道歉，話要好好控制吓自己嘅脾氣，睇嚟佢講過就算，完全唔考慮目前球隊每下愈況嘅處境。