加稅壓力大，即時打窒樓市購買力，要預多啲錢交稅，供樓條數又唔可以減少，負擔一定係大咗。正所謂一闊三大，所以大部份有能力或啱啱夠錢置業嘅人士，都可能會停停步諗諗先。
美聯早兩日做咗個電話調查，訪問一百零七名客戶，結果五成悲觀看待樓市前景，覺得平穩嘅佔兩成左右，其他都係無意見，而且無一個認為樂觀。近排咁多個調查訪問，最悲嘅相信係呢個。
重唔止呀，認為樓價會跌嘅，佔七成一，其餘兩成九就無意見或者認為無升跌，同樣地，完全冇人覺得樓價會起。
美聯加咗個注腳，佢話咁嘅結果，顯示舊年政府硬銷孫九招挽救樓市，市場信心好似好番啲，點知一個財政預算案就完全摧毀一切，樓價跌幅只會進一步加劇。
美聯主席黃建業指出，孫九招對樓市嘅短期刺激已經耗盡，減少供應嘅長遠效果，又未到時候浮現，樓市仍然內傷，財案竟然大幅加稅，有如在傷口上灑鹽。佢建議政府應該做番啲實質嘢，例如放寬七成按揭，刺激二手交投，恢復市民入市信心。至於點解要救二手樓？黃主席話，二手樓俾一手市場打到毫無還手之力，應該先幫助，樓市發展至正常。
經常仗義執言，最近又因反基本法二十三條，同政府對撐嘅前大律師公會主席湯家驊（圖二左二），聽講都鍾意買吓物業投資，佢昨日就同家人到設喺紅磡嘅畢架山一號售樓處，參觀示範單位。發展商當然不敢怠慢，長實郭子威（圖二左一）全程招呼周到，帶佢哋睇咗兩個示範單位，同介紹個盤嘅整體規劃與周邊環境。
另外，據郭子威講，日前有一名中美洲客，以七百五十萬元買咗個一座低層E室，佢話個客講明諗住作投資移民之用，因此長實都會盡量幫個客，當下半年政府投資移民政策出籠後，會為佢提供足夠嘅買賣證據。單交易亦成為畢架山一號首宗投資移民個案。
有裝修嘅二手樓一般較受歡迎，就算價錢高啲，買家都肯承。但市場有無良炒家集團，同裝修公司掛鈎，專買入殘舊單位，只做門面翻新就轉售圖利，行內稱之為化妝樓。
蘭西就聽到一單中招事件。有位買家購入一個有裝修單位，入伙後搵煤氣公司開爐，先知個爐具係用石油氣嘅，重係唔合規格㖭，卒之搞一輪同多付一筆錢至搞掂。
咁重未算離譜，廚廁表面簇新嘅瓷磚，後面仍鋪住原有嘅磚，業內人士話咁做法，兩三年就會剝落，且有潛在危險。結果買家為安全計，由頭搞過，前後唔見咗三四萬。蘭西惟有奉勸各位，方便莫貪。
恒隆東半山豪宅租盤御峰，標榜多媒體家居享受，特別選用母公司喺德國KRONE通訊公司提供嘅Category5e網絡方案，當中涉及超過五萬米長嘅銅線、三百幾米長嘅光纖電纜、一千六百個話音插座、八百幾個數據傳輸點等等。有關方案可有效節省建立結構化布線系統的元件配搭程序……唔明？唔緊要，最重要係明白到，提供嘅多媒體設施，如互聯網寬頻接駁、電話與電視系統的質素，喺有關嘅網絡技術下，得到提升。再簡單啲講，就係御峰有非常方便又先進嘅上網通訊設施。
美聯物業培訓及發展部，將於明日舉辦全新地產代理專題講座，講題係「法律與守則」，美聯法律顧問陳建柱任主講，內容包括防貪及盜竊罪行、地產代理條例、個人資料（私隱）條例及保障投資者條例等，做經紀或者想買賣物業嘅，都應該聽多啲知多啲，個講座重係公開嘅，有興趣人士都可以參與。
蘭西
電郵地址：
