如果你以為「豬骨」只會放在一個個火鍋湯底內，供你打邊爐就錯喇！豬骨已經以唔同的面貌，滲進不同菜式入面，變成好多種美食的靈魂（湯底），唔一定要有骨落地，至可以感受豬骨的「味」力。
雖然小記係潮州人，但對呢個家鄉所知不多，極其量聽過盛產潮州怒漢，小記亦是呢種優良物產；不過來到「潮州巷仔」跟老闆胡先生做訪問，他的溫厚感覺完全「潮州怒漢」Feel欠奉，談到食，他娓娓道來，已感到他對食的執着；而食店入面的清簡布置，亦貫徹他的性格，清簡而不花巧；再試他以豬骨湯做湯底的菜，就明白他粗菜精做的理念，菜雖簡單，但各有特色，細處講究，令人回味。
呢度嘅材料大部份都係用新鮮貨，鎮店的清燉牛腩湯（$38）亦唔例外，鮮牛腩會帶點羶，但用豬骨湯去煨，反而帶出其鮮味，再加潮州鹹菜去煮，啖湯鮮之餘帶點酸，令人十分開胃。
呢個白菜魚餃湯（$38）係此店的招牌之一，魚餃的魚和肉餡都是鮮肉做，之前過年有十日因為鮮魚供應不夠而暫停，白菜亦是潮州運來的汕頭白菜，香港甚少見，加埋豬骨湯，真係好鮮甜，連帶個餃都滑啲。
好多熟客到呢度開餐都要做「蠔」客，叫一碗肉碎蠔仔粥（$26）。呢一碗蠔仔粥吸引的地方在於主角蠔仔，唔止比出而食到的大粒，而且無一陣被污染的火水味，原來這些都是胡生精選的珍珠蠔，唔係一般的本地蠔。
胡太代替老實又帶點羞澀的胡先生做代言人：「潮州菜以粗菜精做為理念，就以呢啲湯菜為例，就係以一煲每日用新鮮豬骨精心熬製嘅老火湯做「引」，變出唔同菜色，更為菜色帶出唔同嘅鮮味。」不願出鏡的胡先生好自豪地說：「我哋呢煲湯每日都用成近四十斤新鮮骨精心熬製，豬骨煲之前經過出水去血污，所以骨頭甜得嚟重好清，完全唔使加味精。」
麥先生：「我喺附近返工，最初入嚟都係貪就腳，但試過啲嘢都好啱口味，所以經常嚟，最欣賞必定係方魚肉碎蠔仔粥，幾乎係必食之選。」
地址：旺角豉油街84-86號9-10舖
電話：27357337
營業時間：11:00am-2:00am
骨煲熱潮一起，霎時間到處大、小食肆都是貼滿「正宗澳門骨煲」的字眼，給人感覺好似豬骨就只有打邊爐一種食法，其實豬骨的「味」力並非豬骨煲獨沽一味，好似以骨煲馳名的巨瀧，就食住骨煲熱，推出一系列。
食豬骨煲的時候，好多人都會用海鮮一齊打邊爐，骨湯的甜，加海鮮的鮮，可以話係完美的組合，而呢個胡椒豬骨湯浸花蛤（$58），靈感來自澳門的胡椒濃湯浸花蛤，唔知遲些會不會成為熱門名菜。
好多供應泡飯的食店，因為每天賣泡飯數量不多，所以只會用一窩味精水做湯底，但呢度每日都有新鮮骨湯供應，因利成便推出泡飯，質素更有保證。推介海鮮骨湯泡飯（$68），鮮甜又飽肚。
地址：九龍城南角道6號地下4-6號（近太子道西）
電話：27181000
營業時間：5:00pm-5:00am
香港人嗜食日本拉麵，特別係源於南部九州、博多一帶用豬骨以大火長時間熬煮的豚骨拉麵，更加係香港人的至愛，好多賣這種乳白色濃湯拉麵的地方，每日都大排長龍，但大家又有冇去過這間位於幸福中心，開業快將二十年的香港元祖店呢？
呢碗喺日本現在勁流行，全港暫時只此一家的熬子魚湯拉麵（$48），湯是用日本熬子魚熬出來，又清又鮮甜。
長崎海鮮湯麵（前$58）使用的拉麵是江山樓八十年來一直使用的油麵，質感與別不同。而叉燒拉麵（後$46）的叉燒是自家製的。
來港十多年的川上先生：「呢度啲麵正宗又好味，我一食就食咗十年，每星期起碼嚟兩至三次。」
香港出生的店長島田小姐84年在日本學成煮麵歸來，就開了這家店。原來她學煮的麵是八十年前已在長崎開店的江山樓長崎湯麵，因為這裏的口味十分正宗，所以二十年來吸引不少在香港工作的日本人幫襯，以一解鄉愁。
一煲靚白湯的製作過程好複雜，呢度每日用十五斤以上的豬上骨，加大量洋葱、大葱、薑等先煲六小時，再以大火煲兩小時，邊煲邊加水，煲完再用半天降溫，等脂肪自然浮上，然後再撇走油脂，再加大量雞腳再煲，以增加黏性。
電話：27224826
地址：尖沙嘴加連威老道幸福中心地庫B1號
營業時間：12:00nn-3:00pm、6:00pm-11:00pm