最近啲高官頻頻失言，阿松呢頭為寸盡港人嘅「折墮論」道歉，噚日民政事務局局長何志平出席創意工業工作坊時，竟然重敢「爆肚」，將讀到一半嘅致辭稿收埋，八方都替佢揑一把汗。
根據何志平嘅理解，創意工業即「食腦工業」，佢細細個已經好嚮往做又好玩、又搵到錢嘅工。八方雖然唔知佢𠵱家份「問責局長」工屬唔屬於呢類，但都好佩服何局長即席表演「創意」，當記者問到前日康文署派大批職員，「保護」特首夫人董太去花展賞花，俾市民投訴擾民，何局長竟然反指影響市民賞花嘅係傳媒，因為記者太急於捕捉董太風釆。
講開創意，何局長前日就俾人鬧「偷橋」，選委會成員程萬琦同大中華證券主席蕭炎坤，指摘何志平提議起武術訓練中心，係偷咗佢哋起少林分寺嘅橋，何局長解釋兩件事性質完全唔同，唔係「偷橋」喎。
﹙圖﹚一班參與「創業奇兵」輔導計劃嘅年輕人，向何志平（右）解說創業大計。 張志華攝
傳真︰2623-9278
電郵︰