恒指9000點終於失守，上周五最低跌到落8869點，距離上次低位不遠。美國同英國都聲稱會郁手攻打伊拉克，市場氣氛好差，買認沽輪成為潮流，不過認沽輪嘅選擇非常有限，所以唔少散戶都湧去買9556同9559。
9556同9559呢兩隻認沽輪之所以咁好炒，皆因佢哋都有唔錯嘅槓桿比率，令炒家喺好短時間可以賺到一餐晏仔。兩隻輪喺過去一周嘅表現非常唔錯，不過聽一位做開窩輪嘅朋友講，話說有間網上資料供應商將隻9556恒指法興三零三C嘅Put輪，當咗係隻Call輪咁計溢價，結果計出嚟之後，隻輪嘅溢價由原本嘅1.35%，升到去16.9%。
由於有好多散客無計清楚，以為隻輪勁貴，驚住莊家會稍後殺溢價，就嗱嗱聲一早掟咗隻輪出街，結果當然賺少好多。後嚟先知道咗單嘢原來係供應商擺烏龍，非常之勞氣，聽講重話要求供應商賠償，不過照伏勝睇，供應商有免責條款頂住，啲散客都好難會有得賠。
對上一個禮拜，風頭一時無兩嘅海爾中建（1169）升到去兩毫半之後，好似完全無晒力，有市場行家話，海爾喺呢單交易裏面完全冇好處，因為隻1169𠵱家嘅市值二十億都唔夠，要鯨吞一間擁有超過百億嘅海爾，根本就無可能。加埋海爾會唔會咁筍，明益海爾中建嘅大股東麥老闆？
此外，注入咗新資產後，可能搞到要向股東全面收購，未必係好事，所以有好多人就懷疑海爾注資單嘢係流料。照伏勝睇，單嘢的確幾奇怪嘅，事關有好幾個行家喺單嘢曝咗光之後，大力沽貨，驚住走唔切咁，睇嚟真係有啲古怪。
伏勝