賓架陳最近去一間富豪飯堂飲茶，啲相熟夥計對佢一樣黑口黑面，部長亦然，著名嘅靚點心好似係翻蒸嘅，搞到賓架陳好冇癮，但佢為咗免影響人哋份工，酒家名唔好寫矣。賓架陳話：「啲夥計咁𤷪𤺧，怕係冇雙糧花紅兼夾減薪之故，連續忍咗幾年，卒之開始頂唔住壓力，形之於外，想做戲，堆啲假笑容都費事，以後我又去少一間酒家。」
香港人人處於壓力之下，幾時去到爆煲邊緣，冇人知。人大代表、民建聯高層馬力喺《明報》、《虎報》各有一個專欄，近月寫文，對董特首政府諸多批評。《南華早報》發表社論要董特首上神枱之後，馬力喺《虎報》（三月四日）長篇大論，力數特區政府不是，文章標題係：EnemyofthePeople（中文可譯為「人民公敵」，唔知係馬先生自己寫嘅，還是《虎報》編輯加上去呢？）呢篇文章，令好多老外矚目，有人傳真過嚟，特登要左丁山睇，際此人大會議開會時刻，馬力在京開會，見到董特首，唔知會唔會去北京飯店，飲杯下午茶，慢慢傾掂佢。
《文匯報》素來支持民建聯，支持董特首，三月四日發表社論呼籲港人「共同負擔」，為梁錦松打氣；人大代表馬力就恰恰相反，高舉反松旗幟，認為特區政府"makeenemyfromeverywalkoflife"，語氣十分嚴峻，與《文匯報》論調完全唔同。兩張英文報紙都與「政府為敵」，唔怪得啲老外打電話問左丁山：「發生乜嘢事！」