頻頻轉人　阿伯頭暈
晨女集中火力𠱁塞豆窿

雖然換人換到頭暈嘅Morning娘人氣不斷下跌，唔少阿伯同OL去唱K時，已經話唱晨女嘅歌好out，但慘得過晨女成功搵到新客路──細路，𠵱家佢哋主持嘅兒童節目《嚟TinTinTown玩啦！》鬼咁受歡迎，個個日本塞豆窿都當咗晨女喺節目講嗰句「PUNI！」係口頭禪。

高科技冇呃細路
我羅拉雖然未睇過《嚟》呢個節目，但最近我就買咗本同個節目一樣名嘅童話書，唔好話細路仔，連我睇完都覺得自己零舍有童真。本書入面有幾個環節，包括加護亞依同希美教做人道理嘅「JIZOPONN」，矢口真里同新垣里沙教妹妹仔扮靚嘅「MissHouse」等，重有新嘉賓松浦亞彌教玩魔術嘅「HappyMagic」㖭！個個都好colourful好益智。本書同個節目一樣，利用CG電腦技術將十三個晨女變成卡通「Lilliput王國」嘅公仔，香港啲兒童節目簡直冇得比啦！
但講到本書最盞鬼嘅，就係每一頁都有特定嘅空位，畀小朋友貼貼紙，又睇得又玩得，小朋友見到自己嘅偶像變咗童話主角，都特別容易投入。