香港樂壇人有「新人王」關心妍同埋蕭正楠，至於車壇方面，若筆者話三菱Colt係「新車王」，相信大家都唔會反對；皆因無論響日本本土，抑或係本港車壇都深受車迷追捧，尤以一眾年輕車迷為甚。而今回「用車報告」主角Garick，亦被呢款「新車王」所迷倒，究竟Garick對Colt有何評價呢？大家不妨一齊嚟睇吓！
記者、攝影：黃凱穎
「其實三菱Colt未到港之前，我已經好留意各大報章同汽車雜誌，各項關於佢嘅報道；因為佢畀到我嘅感覺，除咗線條實淨有好重男人味之餘，當中車頭嗰Part重好型㖭！」Garick笑說。而響揀三菱Colt作座駕之前，Garick亦睇過豐田Echo、本田Jazz同日產March，但佢覺得Echo同Jazz已推出有一段時間，外形已開始有點看膩嘅感覺，而March就比較女性化；相對地，Colt外形就畀到人有一份驚喜，及後當新車正式進駐陳列室，Garick再親身前往睇車，唔使兩日就經已決定買車，而且重有計劃幫部車作少量改裝，例如加裝雨擋、泥擋等等，好讓部車與其他Colt有所不同，可想而知佢係幾鍾意部車呢！
唔知以前揸開豐田Corolla呢類家庭房車嘅用家，改以五門小車Colt作座駕之後，又會覺得點呢？Garick說：「車廂空間其實同一部家庭房車無太大分別，甚至更好，尤其係後排，腿部空間較我之前部Corolla大之外，可作前後移動嘅後排座椅，重能夠迎合唔同乘客嘅需要㖭！重有呀！前排亦都好闊落，就連我女友都話坐得舒服㗎！」另外，特多儲物匣及前座手枕儲物袋布局，亦令Garick對Colt嘅評分增加不少！
駕駛感覺方面，Garick最鍾意部車嘅巨型擋風玻璃設計，能予人有更廣闊視野範圍外，一台1.3公升MIVEC偈匹配INVECS-Ⅲ無段變速CVT自動波，起步反應敏捷。「吖！我重好鍾意佢嗰套ETACS系統，因為如果我唔記得開鏡，當車速到30km/h時會自動開啟，就連離開部車之後唔記得關上車窗，只需要用遙控車匙將之關上便可，真係好方便㗎！不過，我就覺得部車A柱較粗，轉彎時會阻礙駕駛者視線喇！」Garick說。
剛啱喺去年11月於日本推出嘅三菱Colt，初推出時便廣受車迷追捧，而於年初正式抵港時，亦同樣受車迷歡迎；正式抵港型號包括有Sporty及Deluxe兩個版本，當中Sporty型號更有齊包圍、尾翼等等，望落真係好型㗎！而一台1.3公升直4MIVEC引擎，除動力輸出充裕外，而且重有慳油嘅特性㖭！
引擎：1343cc直4DOHC
馬力：90ps/5600rpm
扭力：12.3kgm/4250rpm
尺碼：3870×1680×1550mm
軸距：2500mm
車重：1030kg
新車售價：約港幣12萬起（Sporty版）
查詢：環宇汽車（27211111）
如果你係車主，而座駕又已落地三個月或以上，兼且重想與廣大讀者分享你對座駕嘅感覺的話，我哋都願意將你嘅心聲寫成《用車報告》；有興趣嘅朋友，可利用以下方法同我哋聯絡。
傳真：27420542
電郵：
郵寄：香港將軍澳工業邨西駿盈街八號《蘋果日報》副刊「車天車地」版「用車報告」收
（來信請註明姓名、年齡、聯絡方法、車輛型號等資料）