FIA鼓勵細車隊有更大生存空間，最近又諗出新辦法，就係任何車隊想喺賽事前，於跑道試車多幾個鐘；答案係絕對無問題，只要呢支車隊全年嘅試車日限於10日內便可。喺賽道上多走一、兩個圈，對部車喺賽事嘅Setting調校好有幫助，對新車手亦好有利；而其中四支採用呢種方法報名嘅車隊，包括有佐敦福特、積架告士禾夫、雷諾及文諾迪。
另外一項即時生效嘅條例，亦係同部車有關嘅，就係於2003年開始，禁止由Pit傳送去部車嘅電子訊息，即係所謂嘅Pit-to-cartelemetry。原本部車響賽道上跑緊，車隊喺Pit內用Telemetry技術，可即時收到部車每部份嘅狀況，呢啲數據會顯示到部車邊度有可能開始壞，車隊於是可以遙控改變部車嘅設定（例如引擎、波箱等等），等佢可以襟行啲；但由今年開始，Pit內嘅工作人員，雖仍可利用Telemetry技術，得知戰車嘅狀態，但不可用遙控技術作任何改動或補救。
文：陳自齊