有冇發覺，今季缺「水」嘅球隊，好似德甲凱沙羅頓同埋意甲拉素都響盃賽好醒神？梗係啦，盃賽獎金和味嘛！今日響足總盃作客錫菲聯嘅英超褪色勁旅列斯一樣負債纍纍，唔知會唔會因為一份撲「水」動力而踢高半皮波呢？
據講凱沙羅頓連下季參加德國聯賽嘅註冊費都未必攞得出，證明佢哋財政真係好唔掂，不過佢哋已經打入德國盃決賽；拉素都唔差，已經入咗歐洲足協盃八強、意大利盃又入咗四強，證明呢份撲「水」勁唔講得笑。
不過本報負責貼列斯場波嘅華度就唔信邪喎，誓神劈願話錫菲聯下盤實掂，即管睇吓佢係咪獨具慧眼啦。
最近盛傳阿仙奴同埋曼聯力爭簽入新特蘭嘅丹麥門將蘇連遜，阿仙奴龍門兵源不嬲唔多夠，想斟蘇連遜就無可厚非，之但係曼聯明明有個水準幾穩嘅巴夫斯，連後備列卡度都無機會落場，又使咩要簽呢件丹麥佬？唔通係費爵爺當年簽入舒米高實在太成功，想食多次丹麥曲奇？
阿積士將前鋒美度借咗去切爾達，令唔少人覺意外，話晒隊波得番尹達美迪同伊巴謙莫域兩件前鋒，點夠應付聯賽同歐冠？但知情人士就一定知美度成日鬧離隊，又試過唔出席記者會玩失蹤；阿積士班波好年輕，對軍紀同形象自然更着緊，今次殺雞儆猴好合理。
巴黎聖日耳門教頭費南迪斯日前話巴西前鋒朗拿甸奴因為胃痛，好可能錯過禮拜日對馬賽場波。計我求大俠話朗拿甸奴未必因為胃痛唔落場，可能因為上個禮拜俾球迷襲擊後身心受創，無心機踢都唔定。聖日耳門麻煩多多，「細哨」都係早啲離隊去歐洲強隊掘金罷啦。
意大利聯賽會認真騎呢，突然間到前日至判羅馬第二次上訴得直，畀佢哋位年輕前鋒卡斯辛奴踢噚日羅馬對拉素場聯賽打吡戰。截稿前未知賽果，之但係呢個小朋友落場唔多唔少影響大局。有啲咁嘅騎呢賽會，買意甲早飛盤有時真係福禍難料。
呢排巫師、魔術同公鹿三隊嘅季後賽之爭，已經鬥到入直路。我求大俠睇咗波神佐敦咁多年，自然希望佢好頭好尾，可以帶巫師入季後賽。點知巫師班後生仔真係正宗扶不起的阿斗，噚日對公鹿攞分重要靠已經五勞七傷嘅佐敦，最慘係其餘叫打得好啲嗰個竟然係三張幾嘅列拿。唔該史達侯斯同曉士呢啲後生仔爭氣喇，真係想打死波神咩！