日本萬事得車廠，喺剛啱舉行嘅第73屆瑞士日內瓦車展上，展出咗最新款MXSportif概念車，廣受車迷歡迎之餘，而其極富年輕活力感嘅造型，更教人對其留有深刻印象呢！
從外形而言，呢部一直有傳係新款Mazda3概念型號嘅MXSportif，可謂極具年輕活力感；首先，此車車首造型用上酷似同廠RX-8跑車設計外，圓潤而流暢嘅線條亦見有一份吸引力，再襯以四輪18吋五幅式合金跑車胎軨組合，就最能將呢個特點展露出來。至於車廂布局方面，除以乘坐舒適性為主外，前排仿桶形座椅加上三幅式跑車軚環配搭，亦具有一份吸引力；設備配搭亦見齊全，用落倍感方便。廠方為MXSportif配用一台2.0公升直4MZR引擎作為動力核心，擁有154ps/6000rpm馬力輸出（估計數值），同埋19.1kgm/4500rpm扭力（估計數值）外，加上5前速手動波箱，性能表現倍見出眾呢！