潮流興吃豬骨煲，未嘗過，彷彿與時代脫節。嘗過的，個個充食家，你說這家是澳門正宗，我說那家是深圳正宗。以下推介的豬骨煲，是否最最最最正宗，不敢說也無謂說。查實談吃，管他甚麼正宗不正宗，只要好吃，家家是正宗。
沒說謊，開張2個月，晚晚排長龍，搭正晚上六時半，難找半張吉枱。旺自然忙，老闆娘Shirley姐一時招呼客人，一時執拾枱椅，稍有空閒，抽口煙，說句：「託賴」。憑甚麼託賴？除了那備受食客追捧的深圳豬骨煲之外，坊間罕有的火鍋配料，也是賣點之一。
極黑牛是美國安格斯和日本混種，極矜貴，無渣、嫩滑、軟熟，真正的入口即溶。最好伴洋葱蘸芥末生吃，怕生吃，放湯稍灼即入口，灼太久，變韌，只會糟蹋極黑牛。豬竹腸，即豬粉腸，100隻豬也未必找到一副豬竹腸，其矜貴可想而知，比普通豬腸更爽口。
牛心椗即牛心臟大動脈，豬天梯即豬上顎，兩者皆爽滑，本身無味，建議蘸芥末吃。
魚子蛋內釀蟹子，咖喱小丸子以咖喱豬肉作餡，麻辣福州丸包着辣味豬肉碎，還有福州魚蛋，一咬，全有醬爆效果，很誇張。
杜先生：「至欣賞呢度啲豬骨，多肉多骨髓，襟𡁻得多。」
師傅仔：「日用150斤骨，豬筒骨佔8成，豬雜骨佔2成，加杞子、紅棗、粟米，熬至少6小時，我哋係正宗深圳豬骨煲做法，唔加蘿蔔同黑胡椒，真材實料，湯水自然奶白色。」
地址：佐敦廟街286至298號華志大廈地下8號舖
營業時間：6:00pm至6:00am
分店開到第7間，受歡迎程度可想而知，老闆Martin極注重湯底：「用醃製過嘅配料打邊爐，會令湯底起泡，一影響賣相，二會破壞豬骨湯鮮味，所以我用海鮮配料做主打。」食用配料次序亦考究：「先食部份豬骨，之後灼金錢𦟌、手切肥牛等肉類，跟住到海鮮，再烚菇類，最後放菜、豆腐、粉麵，咁嘅次序先保留到湯底原味，兼可以加強湯味層次感。」信不信由你。
兩者皆來自水質較清的南中國海水域，花蛤每碟至少20隻；大蜆大得誇張，足有6吋長，啖啖肉，每碟6至8隻。
Martin：「雞髀菇、秀珍菇、鮮冬菇、豬肚菇、靈芝菇……邊類菇新鮮就執多啲，總之一定大大碟；食得辣嘅話，食牛滑不妨點我哋自製嘅超辣蟹醬。」
李庭：「估唔到個湯底咁甜，好味道呀。」
師傅貴哥：「200斤豬手骨、豬脆骨、西施骨，同水嘅比例係1比1，大茴、小茴、老陳皮之類嘅香料分7次落，熬足6粒鐘。我哋係澳門正宗，粟米、蘿蔔、大蒜、唐芹落到齊，但會加橄欖油令煲湯無咁肥膩，用白胡椒代替黑胡椒，因為黑胡椒比較燥熱。」
地址：大角嘴棕樹街10至11號地下
營業時間：6:00pm至6:00am
豬骨煲湯底愈白愈好，人所共知，卻有人反其道而行，偏要搞噱頭，弄得湯底又黃又紅，經理Danny解釋：「香港人乜嘢都三分鐘熱度，麻辣、沙嗲，斷估都算首創啩，有新鮮感應該吸引到食客，何況你要原味豬骨煲，呢度一樣有啫，但某啲火鍋配料，第二度又未必食得到噃。」
4両重法國鵝肝，先浸法國白酒，切片上，上枱前再撒點名為「他力根」的香草，味甘香。
Danny：「雖然係急凍牛，但起晒雪花，色澤夠紅，當新鮮牛肉賣都得。」野牛爽是蒙古野牛的背脊肉，有原味與黑椒2種味道選擇，味似牛腩，但更爽滑。
Pricilla：「辣之餘重食到豬骨鮮味，不過個湯太辣喇，豬骨我會𡁻埋，但湯就唔會飲囉。」
Danny：「60斤豬手骨、豬𦟌骨，加白胡椒、紹興酒熬足6小時，湯底配料照舊有蘿蔔、津白菜、唐芹，另加雞腳令湯底更杰身，咁就係正宗原味豬骨煲。至於麻辣煲，會放大量指天椒、八角、香葉、草果、陳皮、花椒乾粒，再熬2小時；沙嗲煲重簡單，喺原味煲裏面再加最靚嘅福建沙嗲醬，熬多2小時搞掂。」
地址：九龍城太子道354號地下
營業時間：6:00am至2:00am