李嘉誠巨額投資嘅3G服務，終於喺英國同意大利推出咗。投資咁大，和黃大班霍建寧自然好重視，上個禮拜一（三號）開幕當日，親自飛去倫敦視察兼巡舖。佢為咗呢個項目，過去十幾個禮拜喺歐洲，連農曆新年都要同太太喺嗰邊過。
噚日大班特登喺周六畀記者親身體會一吓3G手機嘅功能，3G強項係視像，大班就親自播放由英國下載、湯漢斯嗰套《捉智雙雄》嘅電影短片，又播英超聯宣傳短片畀記者見識，重用手機拍Video短片㖭。
至於3G幾時喺香港推出，大班話香港個網絡重有啲唔穩定，六月先至推出。咁個電話喺香港下載短片得唔得呢？大班即刻播另一條英超聯短片畀記者睇，話係早幾日喺中環海都食飯嗰陣下載嘅。
照計大班同人食飯，冇理由得閒下載Video啫，不過同好朋友食飯就唔同。八方線人報料話，上個禮拜四，見到大班同佢老友、有爆棚哥之稱嘅殼王陳國強喺海都食晏，佢哋一路食一路玩手機，大班重好有心得咁向殼王示範點樣玩機。
（圖）霍建寧示範玩3G手機，班記者都十分好奇。霍大班重話下個月七號，會帶隊同記者去英國睇吓3G業務。
傳真︰2623-9278
電郵︰