美伊大戰傳聞一觸即發，除咗《蘋果》有記者隨美軍出發，上戰場採訪之外，本港電視台嘅新聞大戰已經短兵相接，爭相派出記者團。
無綫旗下嘅銀河衛視搵到美資股東，落實最快八月推出收費電視，到時嘅二十四小時新聞台，同有線必有一番惡鬥，今次先上演一場前哨戰。
四地聯播經理出馬
有線喺助理總監馮德雄帶領下，上周四開始喺巴格達、科威特同土耳其三地聯播；無綫不甘示弱，前晚由新聞總監羅燦督軍現身伊拉克，來個四地聯播，比有線多一個據點，就係約旦；亞視派出嘅記者例牌同鳳凰衛視聯線報道。
噚日連無綫嘅助理總經理黃應士都技癢，飛埋去科威特客串記者，噚晚同羅燦一齊出鏡。講到人力物力，無記肯定比人強，超過二、三十個記者喺戰場附近。有線阿頭趙應春就同八方講，目前日日睇住戰況，有乜風吹草動，即速速撤退。
（圖）無綫大晒馬，噚晚六點半新聞四地聯播，連助理總經理黃應士（左上）都親自出馬。 電視圖片
傳真︰2623-9278
電郵︰