粥給人的傳統印象，都係早餐、消夜的簡食，極其量可能下午茶餐都食番個粥，但隨住現在的人「飯癮」愈來愈淺，加埋粥的變化又多，粥的地位都在提升中，隨住呢個豬骨熱潮，唔少豬骨靚粥登場，加埋其他配搭，𠵱家食粥，特別係豬骨粥漸漸亦成為不少人正餐的選擇。
豬骨味鮮，唔只用來煲湯一流，煲粥亦一樣咁正，既然骨湯可以用來打邊爐，點解骨粥唔可以？最近就有食肆用骨粥做鍋底，推出豬骨粥火鍋，唔知呢個會唔會成為豬骨煲之後的另一個熱潮呢？
多款鮮料任選
除了有多款平時食生滾粥都吃得到的生料外，右邊兩碗魚餃（前）及豬肉餃（後）各$18，是打成膠的魚肉及豬肉，係當紅配料。
百變粥底配搭
粥底用鮮大骨加瑤柱來熬，有邊爐湯底的甜，加碟芫荽皮蛋，就變身為芫荽皮蛋窩，芫荽皮蛋後下會更好吃，令芫荽不會黃、皮蛋不老更香。
粥底每窩$28任添，加芫荽皮蛋每碟$10
揸Fit人陳太推介
用豬骨粥底打邊爐，唔只要食晒啲配料，最後啖粥亦一滴都唔好嘥。嫌配料花多眼亂，可叫一個$68的套餐配料（前），有肉有海鮮，灼完粥底好正。
陳先生：「我通常經旺角轉車返工、放工，所以都會喺度食碗粥，推介呢度嘅客家鹹雞粥，雞肉嫩又好有雞味，唔錯。」
店名：一品粥（23923718）
地址：旺角通菜街104號地下
營業時間：11:30am至12:30pm
燒豬骨一向被稱為下欄嘢，唔少燒臘檔都將它做賣燒肉時的頭搭尾，賣不完，就用它們來煲例湯，貪其夠味，味精都可以落少啲；家庭煮婦就喜歡利用它來煲粥，菜乾豬骨粥、皮蛋豬骨粥夠晒下火；亦有粥店將它煲成一大煲粥，賣十元八塊幫補舖租，但原來最近有餐廳，就趁豬骨潮將這些賤骨頭變身成精美粥品。
必食古法燒骨火鴨粥每窩$98
唔少主婦都鍾意用鹹香的燒骨去煲粥，貪其味香帶鹹，係很好的「天然味精」，佐燒鴨來吃一流；而呢度就以綿滑粥底加燒骨、以及即日新鮮燒製火鴨滾幾滾，鮮味溶入啖啖粥內，其鮮甜拍得住海鮮粥之餘，重帶海鮮欠奉的香。
質感豐厚柴魚花生燒骨粥每窩$78
柴魚鮮香而清淡，所以柴魚花生燒骨粥最好就是用啲閹過嘅豬骨來煲，可帶出其鮮味，而呢度唔單只有正粥底配柴魚花生，再加燒骨吊味，畫龍點睛的體現。
招牌腸粉佐粥妙品
呢度的即拉腸粉係佐粥名物，招牌係帶子腸$22（前）同埋以即炸脆熱油炸鬼卷製的葱花脆炸兩$25（後），淨食呢兩味都十分正。
盧先生：「第一次嚟，發覺粥底唔錯，好綿滑，夠火候，我食魚雲粥，魚雲新鮮，唔腥，下次可能同屋企人嚟試吓其他大窩粥。」
店名：帝悅粥麵餐廳（25043080）
地址：銅鑼灣摩頓台13-15號地下
營業時間：8:00am至12:00pm