噚日無綫發生咗一宗情侶失蹤疑雲，話說林文龍同蔡少芬有份主演嘅新劇《陀槍師姐IV》噚日上晝拍外景，馮仁昭去探班時，等咗好耐都唔見林文龍，部劇嘅助導打咗成朝電話都搵唔到佢，以為林文龍無端端失場。
而林文龍女友郭可盈下晝四點本來要返將軍澳電視城拍攝新劇《生命天使》，但到五點都唔見人，搞到全世界都以為佢同林文龍私奔㖭！
直至大約五點鐘，林文龍喺將軍澳電視城出現，佢好勞氣咁話：「噚晚我開工開到凌晨四點，今朝八點又要拍淋雨戲，噚晚我已經感冒唔舒服，所以寫定紙仔畀服裝，叫佢交畀PA（助導）話我今朝開唔到工，當時Ada（蔡少芬）都喺度，佢可以做證。」
林文龍重即時打電話畀助導對質，證明佢唔係失場。至於佢女友郭可盈就因為之前嘅外景遲咗，所以先至晏咗入廠。
而有份拍《陀》劇嘅蒙嘉慧噚日用紗布包住左腳，原來佢前日吊威吔嘅時候扭親，蒙嘉慧今年已經第二次受傷，認真黑仔。
應采兒噚日去銅鑼灣，宣傳GreenHouse嘅「女人香」香薰，佢即時調配以佢個名命名嘅香薰油。應采兒喺溝香薰油嘅時候，多次俾治療師窒住晒，佢本來想揀cream做基礎油，治療師又唔准；佢揀薄荷味香油，治療師又提議用檀香味。不過應采兒話酬勞唔錯，佢話：「今次香薰贊助我，又畀cash（現金），重可以幫我做facial同spa，我覺得好滿意。」
余文樂日前去咗台灣，噚日返港，佢話去幫一個台灣唱作男歌手錄啲嘢，但錄乜就唔肯講，同佢講開財爺梁錦松公布咗財政預算案，阿樂就話：「唉！唔好提嘞，單嘢對個個人都有影響，總之就慘啦，我啲財政一向畀阿媽處理。」阿樂又話返嚟之後要趕住錄音，預計五月出碟。
唐季禮開拍嘅新戲《TitaniumRain》，已經定咗由成龍做男主角，有消息話唐季禮想搵緋聞女友林心如做女主角，馮仁昭打電話問佢，佢話林心如的確係自己考慮嘅人選，但係先決條件要過到成龍嗰關，因為成龍係套戲嘅靈魂人物，佢唔點頭，就算自己幾鍾意都冇用喎。
吳毅將同女友唐麗球拍拖十年，最近佢哋終於決定拉埋天窗，噚日馮仁昭打電話恭喜吳毅將時，佢話會同女友喺五月二十五號註冊，當晚喺鷹君酒店擺二十幾圍酒。雖然吳毅將曾經結過婚，但嗰時佢同前妻喺大馬結婚，只係註咗冊就算，所以佢今次做足儀式迎娶唐麗球，不過佢就唔肯講女友係咪奉子成婚。
