世事如棋局局新，風水原來真係輪流轉。想當年，天下第一莊在90年代中期威過一大輪，但金融風暴之後元氣大傷。
當年第一莊嘅愛股，如今亦逐隻輪流炒，世界集團（713）、星光集團（403）同埋毅興行（1047）已經先後起步。不過，雖然係桃花依舊，但已人面全非，第一莊已冇力再擔大旗。
經紀陳話，睇嚟快輪到台和商事（1037）。小初心諗，經紀陳唔通係講笑？台和商事似乎冇乜概念可炒，斷估都冇可能有業績呢類藉口炒。
經紀陳話，佢都唔明點解，總之隻股長期在0.40元水平橫行，呢幾日第一莊前度得意門生，無端端將佢炒高，抽上0.50元水平，噚日再升3.8%，收0.54元，成交亦較平日大，有成540萬股轉手。由於第一莊以往嫡系股份，近排都叫做炒得起，所以對於台和商事，亦唔敢太睇小佢。
慕容小初