在亞視劇集《萬家燈火》裏面飾演馮寶寶個女嘅十歲小演員林穎彤，身世原來好可憐，佢喺歲半大嗰陣因為俾爸爸拋棄，搞到佢媽咪要抱住佢喺天橋乞食。
雖然穎彤喺咁惡劣嘅環境下成長，但佢好生性好堅強，而呢件事曝光之後，引起唔少熱心市民關注，好似早幾日有位何小姐，知道穎彤最大心願係買部鋼琴，就諗住將自己部鋼琴送畀穎彤！
前日馮仁昭去穎彤屋企探訪時，佢話好多謝何小姐嘅幫忙，重話希望可以盡快摸吓部鋼琴喎。而穎彤媽咪就同馮仁昭講，話單新聞出咗嚟之後，有唔少人認得出穎彤係拍電視劇嗰個小演員。
穎彤𠵱家啱啱同亞視簽咗藝員合約，每個月有幾千蚊人工，加上穎彤家姐搵到嘢做，以後一家人唔使再靠綜援過活。馮仁昭問穎彤媽咪擔唔擔心個女做咗演員後會荒廢學業，佢話一啲都唔擔心，事關個女一向成績唔錯，每次佢一定做完功課後先至去拍戲，好鬼生性。
容祖兒（Joey）同郭晉安噚日喺奧海城為無綫新劇《美麗在望》拍外景，呢排忙緊拍劇同唱片宣傳嘅Joey噚日病咗，重因為頭暈所以唔接受訪問，不過佢一埋位就好鬼精神，認真敬業。而喺佢身旁嘅安仔就話：「我都知佢病咗，可能工作辛苦又唔慣拍劇，今次算係個大考驗，希望佢快啲無事啦！」
男子組合Boy'Z噚日到電台接受訪問，喺節目入面佢哋分別同一位聽眾一組，結果Kenny答中九條勝出，帶挈聽眾攞到獎金二千蚊，但係Steven第一條就已經答錯，搞到好鬼尷尬㖭，佢話：「我𠵱家開始會日日睇報紙，連財經版都會睇埋。」就讀中四嘅Steven重好坦白咁話自己已經一個月冇返學，問佢驚唔驚追唔上時，老友鬼鬼嘅Kenny即時話：「我會幫佢補習㗎啦！」
曾志偉同葉蘊儀噚日去咗馬來西亞，出席一個漁業展覽會，佢哋被委任做「海洋環保之星」，大會負責人跟曾志偉稔熟，並知道曾志偉係佛教徒，唔主張殺生，所以就最啱做「海洋環保之星」。對於嚟緊嘅金像獎頒獎禮，曾志偉憑電影《無間道》提名「最佳男配角」，而對手黃秋生就有三套戲得到提名，曾志偉話：「我預咗秋生會得獎。」
李克勤前幾日接受電台訪問，談到身邊一班好朋友，克勤話喺圈入面三個老友中只有梁詠琪（GiGi）係女仔，克勤話對GiGi同對其他男性朋友唔同，佢話：「男仔唔需要經常見面都可以維繫感情，但係對女仔就唔同，係要細心啲，我不時會傳一些手機短訊畀GiGi，問候一吓。」
