「萬稅」預算案加上一句「有咁耐風流，有咁耐折墮」，財政司司長梁錦松恍如給飽受經濟困局煎熬的香港人再重擊一拳，怨氣幾近沸騰的巿民，昨日一個接一個致電電台節目宣洩不滿。有中產階層大聲疾呼：「我哋係好辛苦賺錢，冇風流過。」有負資產人士聲音沙啞：「我對梁司長徹底失望！」 記者：黎國強
【本報訊】財政司司長梁錦松前日在電台節目中一句港人「有咁耐風流，有咁耐折墮」，換來千夫所指，多名中產階層人士致電電台怒斥梁錦松。有學者及立法會議員則批評，作為高官的梁錦松說話沒有經過深思熟慮，不但令特區政府再難與巿民建立互信關係，更可能會觸發社會動亂。
對於巿民的不滿，梁錦松昨日向各區議會主席簡介財政預算案後拒絕作出回應，匆匆離場。沙田區議會主席韋國雄會後表示，會議上梁錦松除了簡介預算案外，也強調發展本土經濟的重要性，不少代表都向梁錦松提出，希望政府不要提高與民生有關的收費。
多名巿民昨早怒氣沖沖的致電商台節目《風波裡的茶杯》「出氣」，其中一名中產階層巿民張先生批評梁錦松的「風流折墮論」是不負責任，他說：「我四十幾歲人日日係咁做，略有小成，或者買間屋自己住，有個事業做，我哋係好辛苦賺錢，冇風流過。」
另一名負資產人士梁太說：「我對梁司長徹底地失望，佢曾經係我偶像，但𠵱家可能要改變。」她又說：「『有咁耐風流』呢句說話係唔可以講得出口……我想介紹阿松睇一套戲，佢（荷李活電影《甜心先生》）話畀你啲人聽，你哋太用腦、太好計算、太識做銀行家，但問題係你攞個心出嚟好唔好？」
港大政治公共行政學系副教授盧兆興說：「佢講呢句說話會加深巿民對政府嘅不滿，短期內巿民信心更難回復。」
理工大學應用社會科學系助理教授鍾劍華認為，梁錦松的言論會挑起巿民對政府的敵意：「佢講嘢咁唔深思熟慮，相信喺董建華嘅任期內，都好難再同巿民建立互信關係，𠵱家董建華班底嘅威望已經係結構性問題，大家都認為政府無能。」
一直協助負資產人士爭取政府援助的立法會議員陳偉業說：「佢咁講嘢係侮辱緊全港六百萬巿民，理應引咎辭職。」他又表示，「中產冇好日子過、二十多萬低下階層就削綜援、失業率高企、菲傭都冇啖好食，民憤已經接近沸點，重咁講嘢，隨時都會觸發社會動亂。」
前綫立法會議員劉慧卿昨出席一項財赤論壇時表示，梁錦松「折墮」論很「離譜」，她說：「香港好多巿民都未風流過。」民主黨主席楊森在同一場合中表示，財政預算案會加劇社會分化，如果董建華提早退休，香港巿民和外國投資者才可望回復信心。
代表八千名夾心階層人士的夾屋大聯盟發言人賴仁彪說：「加稅已經夠慘，向中產開刀後，重講埋呢啲風涼話，令人更討厭呢個政府，如果有抗議示威，我哋夾屋大聯盟一定參加。」