左丁山唔識日文，幾年前貪過癮，得朋友介紹，入咗香港日本人俱樂部做會員，唔計入會費，每月交會費近一千銀，但五年來到過會所食飯唔夠六次，諗落都係笨笨哋，既然政府要加稅，唔慳啲使唔得，認真要諗辦法縮皮，啲無謂會費應該慳得就慳。
今個月收到嘅日本人俱樂部嘅月刊，一如慣往，一丟了之（因為唔識睇日文），裏面好多廣告附錄跌咗出嚟，其中一本係地產廣告，裏面有啲漢字英文，都睇得明喎。睇真啲，日本式地產廣告，資料幾充足，譬如標題「九廣鐵路沿線」，就有新城市廣場、駿景園、帝堡城、沙田第一城，附出租單位平面間隔圖則，一目了然，重有埋設施指南，夠晒方便，啲日本客要租房住，港九新界樓盤齊全，但所有要聯絡嘅經紀都係叫做加藤、鈴木、中村等等，可見日本人生意始終係日本人世界，本地經紀唔識講日文嘅，相信唔容易打入呢個圈子。
前星期去港安醫院探人，見到有日文指示牌，好奇之下，問一問，原來呢間醫院設咗一條「櫻花熱線」，請日本人答電話，傳開咗之後，全港日本人凡有病要問，都打去港安，入醫院亦入港安，漸漸呢間醫院成為日本人醫院。私家醫院現在經營不易，面對公立醫院又平又靚嘅競爭，確實非要各展奇謀不可，港安開拓日本人市場，行先一步而已。