今晚嘅戲碼喺先弱後強，去到凌晨過後，相信波友會好唔得閒，精選梗係倫敦打吡兵工廠對車仔啦，不過講時講，𠵱家兵工廠炙手可熱，究竟用乜嘢策略可以喺佢哋身上撈到油水呢？
外國博彩公司經常提供強隊奪雙料及三料嘅孖寶，我求大俠覺得呢類博彩最搵笨，好似有間英國著名莊家，開出阿仙奴奪足總盃及聯賽雙料冠軍僅得二點八七倍，計落照乘都有三個開啦，食水都咪話唔深！何況阿仙奴今場九十分鐘W都有成一點九倍，玩到漫漫長路先有三倍，你話抵唔抵買。你捧阿仙奴，場場追住買，回報咪重驚人得多。
至於捧紅魔可以絕地反擊，重奪聯賽冠軍，亦都千祈咪喺𠵱家掂佢哋嘅奪標盤口，因為只有三倍多啲，淨係博佢哋下月作客阿仙奴贏波都估計有三倍啦，重有就係佢哋嗰場贏波都未必保證追到，咁點解要喺𠵱家重博曼聯捧盃呢。
AC米蘭同今季傷愈復出嘅列當度續約一年，AC米蘭今次決定可能係諗住付出咗咁多時間同金錢後，唔想列當度一走了之，雖然呢位仁兄復出後表現一般，既然𠵱家爭緊聯賽同歐冠盃，早啲通知佢有得繼續踢，必然更加放心逐步提升狀態，得益嘅可能咪又係球會！
意大利報章又傳國米對碧咸有興趣，而且重話係由維多莉亞私底下代表老公同國米會長莫拉堤討價；無錯，維多莉亞上星期到米蘭出席時裝展，而費格遜兩個馬主老友日前成為咗曼聯最大獨立股東，而碧咸同老費之間一直咁多是非，唔通……
巴塞隆拿近年俾「死敵」皇家馬德里撬走過費高，佢哋計劃來季想向皇馬前鋒樸迪路埋手，希望成功反撬一次。巴塞表明教練安迪有權幫球隊重組，如果我求大俠係安迪就會向球會推薦，呢位潛質優厚的年輕球員，好過佢做魯爾同朗拿度後備，白白浪費個好球員。
「梳打埠」今個禮拜開荷甲場次依然無咗恩浩雲、阿積士同飛燕諾三強，證明呢三隊同其他對手實力懸殊；反而久違咗嘅蘇超聯就有一場，由死敵些路迪對格拉斯哥流浪榜首大戰，呢場波的確係勢均力敵，各有波友支持，佢哋風險一定無咁大。
有「韓國姚明」之稱嘅南韓高中球星河勝振，將會喺下個禮拜到洛杉磯，接受經理人公司嘅閉門測試。呢個𡃁仔雖今年只得十八歲，但係成七呎四吋高，怪唔得班NBA球探同經理人視佢為第二個姚明，個個昅住佢嘅去向。河勝振個老竇重話，佢個寶貝仔將會加入今年嘅NBA遴選會，到時就多咗個亞洲高佬外援同姚明爭飯食。