何志平最近主動邀約少林寺方丈釋永信大師喺香港起「武術訓練基地」，話可以增加五百就業機會，但就辣㷫唔少人，包括有份選特首選委會成員嘅程萬琦，佢同大中華證券主席蕭炎坤直斥政府「偷橋、截胡」。
原來程、蕭二人策劃咗好幾年，想投資兩億起少林寺香港分寺，連地都搵埋，由「南天王」陳濟棠姪兒陳耀星捐出元朗唐人新村一塊六十六萬平方呎嘅地。程萬琦噚日講到非常撞火，話投票支持特首時已經同阿董提過，其他高官包括葉澍堃、藍鴻震、林煥光都話支持，但申請時就一個推一個，幾年都未有聲氣。家陣何志平上台，一個唔該截佢哋胡，連招呼都唔打個，搞到佢哋非常不滿。
蕭炎坤噚日請晒中國太極五大門派掌門齊集香港，傾點樣發揚太極，講到興起，蕭生話如果政府唔搵佢哋傾合作，唔排除提早開武術學校，少林分寺則遲一步做。
傳真︰2623-9278
電郵︰