中移動（941）高層變動傳聞困擾咗股價一段時間後，管理層噚日先至走出來澄清，今次管理層反應相當遲鈍，不過遲到好過無到，消息一出，股價即時企穩，由低位15.35元反彈至15.60元平收。恒指最後亦守穩於8900之上收市，收報8907，跌幅收窄至55點，成交仍有60.29億元。
不過美伊緊張局勢升級，布殊言論等同向伊拉克發出最後通牒，開戰機會升至99%。惟恐天下不亂的ｉ師傅話，打仗對香港可能係好事，其中一個好處就係令炒家分心，暫時唔得閒搞香港住。財政預算案公布後，拆息及美電又真係冇乜郁過。
軟庫發展（648）停牌前曾傳出，大股東日本軟庫可能出售軟庫發展股權畀一戶好人家，刺激該股於停牌前急升22%。不過噚日復牌通告，只係話出售新加坡E2-Capital套現900萬元，並無其他特利好消息，股價應聲下跌13.6%，收報0.089元。
不過，黑客堅持話傳聞非虛，大家不妨耐心等候。自從科網股爆破後，日本軟庫一直冷落軟庫發展，隻股鑊氣全失，若然真有賣盤行動，點都可以為軟庫發展帶來希望。
紅籌國企續跌，不過鵬利國際（268）噚日則勁升11.5%，收報0.485元，成交更增至1044萬元。黑客話，據聞鵬利將獲母公司注資，噚日可能因呢個消息炒上。不過，鵬利現時投資內地房地產為主，要在內地搵項目並不困難，毋須一定要向母公司收購資產咁煩。另一個炒作理由係，鵬利出售中糧國際（506）股權予母公司套現8.44億元，有可能炒派大息。
阿虎