經常春風滿臉，提起「我同老公……」就四萬咁口的伍詠薇，就算身無時光機，也能輕易把青春留住。只因伍姑娘對身形的重視和生活的講究是日積月累，她的容光煥發，由「錫自己」要吃得好開始，配合適量運動，加多吃抗氧化的食物，所以入行十年，俏臉無走樣，到底伍姑娘有何保持青春之道？現在開古。
「我真係好錫自己！」伍詠薇認為錫要由內而外，要吃得好身體好，表裏都Fit；她不諱言自己是紅酒Fans：「我一晚可飲晒成樽，但日頭做運動，夜晚咁飲法，好矛盾。所以我每晚只嗒一杯。」其實紅酒也有強力抗氧化作用，每晚一杯其實很足夠。
時裝激發意志
每個女人都試過激肥，肥開就意志薄弱，愈食愈多，伍姑娘如何令意志轉軚？「我物慾重，會用物質刺激番自己。我Enjoy化妝影靚相，睇時裝雜誌及行街買衫，食肥咗，着乜都唔靚，無心機買新衫，上鏡又包，為咗滿足物慾，我的意志就變得堅定。」
美臀我選黃佩霞
對於一味「唔食」而瘦到周身得排骨的「好身材」，伍姑娘會畀不合格，她深信飲食和運動是唇齒相依，加上亞洲女性一到中年，臀部容易下垂，只有運動才可避過上瘦下肥的厄運。伍姑娘肉緊的說：「運動令你變得好Charm，個PatPat摸上去係好結實，充滿活力，咁先算正！」論美臀，她的首選是黃佩霞。