梁女士早前與丈夫仳離後，帶着六歲就讀小一的兒子明仔孤苦過活，居住在環境惡劣的舊樓狹小單位。近月該棟舊樓常遭賊人「光顧」，治安極差，另住所離明仔就讀小學甚遠，令孩子飽受長途跋涉上學之苦，又要負擔昂貴交通費開支。惟梁女士母子靠綜援金維持生計，實無力應付遷居的龐大支出。
梁女士的個案近日透過區議員辦事處轉介本報求助。面容憔悴的她幽幽地說﹕「我為咗慳錢所以租住呢度，點知層樓治安好差，經常有陌生人出入，好多戶都曾經俾賊爆竊，尋日我單位嘅鐵閘亦被人撬開過，認真唔安全！」梁女士稱，又因其單位位於後樓梯旁，她在家中經常聽到有人開關防煙門在走廊徘徊，令她常感不安。
明仔自從早前被教育署派往區外學校入讀小一，連月來飽受舟車勞頓之苦。
「𠵱家明仔返學放學每程要搭接近一個鐘頭巴士，既浪費時間又要畀唔少車費。」梁女士續歎謂﹕「明仔返全日制，要預留交通時間，盡量早睡早起，但屋企環境複雜，樓下對正大馬路，晚晚好夜都聽到車聲，令佢好夜至瞓得着，第二朝無厘精神。所以我哋真係好想盡快搬屋，可惜又無能力。」
三十五歲的梁女士，原任職文員，婚後在家相夫教子。殊知丈夫因有婚外情令家庭破碎，梁女士離婚後依靠綜援金維持家計，生活捉襟見肘。「我唔想一直攞綜援，已經不斷搵工，試過應徵文員、辦公室助理同侍應，可惜全部無回音。我又喺舊年十二月讀完家務助理再培訓課程，登記咗想做呢行，但到𠵱家都冇消息。」
刻下，梁女士更為缺錢遷離惡劣的居住環境終日憂心忡忡，「我希望搬去就近明仔學校同環境清靜嘅地方，但我好難儲到筆錢去畀屋租按金、雜費，親戚朋友又個個都手緊，冇錢借畀我。」
按現行條例，社會福利署只會向領取綜援的長者及傷殘人士發放搬遷津貼，梁女士母子除每月獲發租金津貼外，不會獲當局援助遷居。
蘋果日報慈善基金了解梁女士兩口苦況後，即時撥款一萬元，助單親媽媽梁女士支付搬屋費用，解其困境。
捐款編號：C0861
暖流熱線
電話:29908688
傳真:23702192
電郵:
網址：
