建議擺董特首上神枱的幕後集團，居心十分狠毒。此時此刻，乃係禽流感肆虐、隨時變種殺人的春夏之交時份。董特首上了神枱，拜神一定會唔見雞，累到全城師奶無鮮雞稟神，罪孽又深多一層。
做人做到日日被柴台，朝朝醒來自覺由頭到腳犯太歲，這個流年點過都係得個桔。諗落，都戥佢慘情。
神枱太寂寞，董特首再無所事事，老虎蟹都唔會上。但左派學晒黑社會，已經點晒相，講到出口，叫你過主。上台落台，對年已過百老人來說，都是兵行險着，一踏空就粉身碎骨翻渣無望。
這個時候，卡死在唔上唔落尷尬位置，落難的董特首，有冇老友打救？曾經人腳鼎盛的挺董集團今何在？布殊惡極，仍有貝理雅這個細佬貼肉死跟，劈友都肯制。
董特首惡不過布殊，野蠻程度亦相差甚遠。正因為如此，形勢比人強，連手下一個二五仔都反轉背，乘住火滾油猛之勢，插你兩刀，叫你遠離特區政經大事，求求其其撈個黨委書記，做唔做都三十六就算。
午夜夢迴，老董會泱泱大度、唔上心、唔閉翳？假嘅！我忽然心軟，很想幫老董出主意來個大反擊。慫恿他，既然賤人插你兩刀，你谷底反撲，有拖冇欠，回插他們廿三刀！砸他們神主牌！