八方之前講過特首夫人冇陪老公董建華上京開兩會，原來佢呢兩日真係節目多籮籮，前晚睇完「金童子」奇里夫李察演唱會，噚晚又去參加「工商界婦女紀念三八婦女節聯歡晚會」。
董太自從元旦「Complain」事件後收斂咗好多，記者問佢點睇《南華早報》叫阿董升上神枱嘅社論，董太神色驚慌咁答：「我完全唔識回應！」
特首成日俾人批評做得差，佢會唔會安慰吓丈夫呢？董太連聲話：「唔使，董生好叻，乜都自己搞掂！」咁董太點睇新嘅財政預算案？佢竟然話：「我有兩樣嘢係文盲：一樣係政治，一樣係經濟。」使唔使咁謙呀？董太表情更加認真：「呢個唔係謙，係事實！」董太踩到自己咁盡，記者都啞口無言。
但前晚董太去聽歌就輕鬆得多，票價最貴八百八十，財赤嚴峻又加稅，都冇影響董太睇騷興致，重同八方講話最鍾意《WeDon'tTalkAnymore》同《MoveIt》兩首歌，真係識憑歌寄意。
（圖）董太：「我對政治同經濟都係文盲！」，只見佢抱拳作揖，莫非哀求記者放過佢？非也，佢只係祝記者羊年順遂啫！ 司徒世華攝
傳真︰2623-9278
電郵︰