喺日本寫真界殺出一條血路真係唔係咁容易，計我羅拉話，喺日本行性感除咗要好身材同有老細照顧之外，出寫真都要諗吓新橋，唔係嘅話，有人肯幫你出，都未必𠱁到班客仔使錢捧場。好似上個月至喺情人節整完朱古力畀大家歎、十七歲嘅市川由衣，最近又出咗本好盞鬼嘅寫真集。
呢本叫《市川由衣制服Collection》嘅寫真集，顧名思義，係由衣妹大玩制服誘惑嘅傑作，佢唔似有啲有易服癖嘅日本男fans，求其喺啲雜貨舖或性商店買件類似校服物體嘅嘢就着上身，佢真係走遍日本全國搜羅十三間高中，包括東京文化高等學校、日出高等學校、橫濱國際女學院翠陵高等學校等最靚嘅校服先着上身影相，大大增加真實感同視覺享受，咁樣挑逗啲制服迷先至算係高招嘛。
最搞嘢係每幅寫真都係一張迷你Poster，反轉將啲相拼埋一齊嗰陣，竟然會變成原大嘅由衣巨型水着海報。相信啲fans一買本寫真集返屋企，就急不及待享受「任砌」嘅樂趣！