英意西德四個國內盃賽已變成雞肋，但總會有個譜，仍有啲強隊打入決賽。今屆西班牙盃決賽球隊重離譜到竟然係兩支聯賽下游球隊馬略卡同升班馬維爾瓦去爭。
我求大俠覺得馬、維兩隊分別喺聯賽排第尾五同包尾，從而推斷呢個盃仔地位，確比其他盃賽差啲。
馬略卡今屆威過一輪，聯賽最高升到第二，之後跌到𠵱家呢個低位，輸盤輸到喊，不過喺盃賽猛捧佢就真係猛執；維爾瓦就先苦後甜，最近重不時令捧場客笑哈哈，以護級嘅球隊嚟講，重可以令支持者喺盃賽有油水，都算佢哋有本事。呢周聯賽兩隊同有主場，佢哋夠晒旺，到底又畀到幾多信心波友呢？
維拉雖然喺英超排第十四，多尾三韋斯咸九分，但係佢哋三、四月嘅對手好強，有曼聯、阿仙奴、車路士、紐卡素、修咸頓、愛華頓同要搶分嘅韋斯咸，一個唔好彩輸晒嘅話，而其他下游球隊又搶到分，維拉隨時爆大冷降班，唔怪得領隊泰萊已經閉翳緊。又夠膽又黑心嘅球迷，不妨貼有杜布連長坐波監嘅維拉降班，或者會有意外收穫㗎。
阿積士嘅聯賽最佳射手美度同教練朗奴高文唔啱牙，日前重話明從冇向會方教練職員道歉，因為佢自覺冇做錯嘢，所以佢唔怕俾人繼續雪藏，而且重話年尾過檔巴塞隆拿。咦！我求大俠覺得佢轉會巴塞十畫未有一撇，而且巴塞冇錢，會唔會買人係疑問，否則，美度你到年底冇人吼，衰衰咁又真係幾瘀㗎。
拉素前日響歐洲足協盃作客反勝克拉科夫二比一，估唔到佢哋無因為禮拜六要火併羅馬而留力，精銳盡出，抵贏。教練文仙尼賽後彈個場差到無人有，話場波應該再改期喎。據報連球證杜加利都扭傷，吹咗十五分鐘離場，個場又真係唔多妥。不過拉素賽期咁密，再改期咪盞搞，𠵱家贏咗咪算囉。
拜仁門將簡尼情陷三角戀，日前突然回心轉意，睇番個老婆同剛出世嘅BB，但當問佢點處理呢個三角關係時，佢就模稜兩可，根本唔知點算。不嬲以為簡尼兄好果斷，今次卻好婆媽，或者感情嘅嘢搞到佢頭都大埋，但係總要有個了斷，如果我求大俠係嗰兩個女人，就一腳將簡尼伸去大西洋算數。