按放假慣例，理應整天和那可愛的被窩「糾纏」，但這個星期天，卻破例做了陳氏一家的電燈膽，跟着他們到了元朗錦田，來一次家庭樂。一個地方，有齊射箭、釣魚、燒烤……一家大小都盡興。離開時，問細妹覺得好玩嗎？她大力點頭說最鍾意餵兔仔，而令我最回味的，當然是首次嘗到於蜂巢內的超新鮮蜂蜜。計落條數，開開心心玩一日，每人唔使$100。
記者：招佩珊 攝影：陳盛臣 ImageFamily：陳氏家庭
逢星期一、三、五刊出
嘩，好型！場內突然出現幾個駕駛哈利的有型有款男士，莫非來這裏賽車？還是踩場示威？查實是有個哈利電單車會將於10月在這裏搞個大型Show，今次先派幾個型男來巡場。
那邊廂，又見到一群為數約60個身穿迷彩服的軍人圍在一起，不得了！要開戰了？原來這裏亦有Wargame場地，除了可玩足全日外，亦可參加一小時「短打」，這班Wargame友意見一致：這裏有車場、別墅、高地平原等不同類型場地，夠多元化。
甫下車即時睇睇地圖，弊！這個俱樂部有齊釣魚、射箭、養蜂場、花圃、Wargame場，究竟玩邊樣先？陳爸爸話要試試射箭、囝囝就鍾意釣魚，而我還未拿定主意就已一手被細妹拉住話要陪她去餵兔仔，陳太同家姐亦先陪陪細妹齊齊睇兔仔，也好，當作熱身吧！於是兵分幾路實行各有各玩！
這個兔仔樂園約有千多呎，數一數大約有三、四十隻兔，用$5買了一小袋紅蘿蔔就可以去餵牠們。兔仔們的確好識歎世界，躲在長櫈下乘涼避陽光，反而全場最生猛的是細妹，一時走到左邊大叫呢隻好肥，一時去到右邊話呢隻長了長毛似狗仔，我這個未餵過兔仔的大鄉里就這樣跟住細妹滿場飛，誰說餵兔仔不要力氣？
望一望距離約100米的燒烤場，漸漸圍了一堆又一堆人，原來午餐時間又到了。其實這裏亦有提供元朗最出名的圍村盆菜，當日正好來了一班為數約200人的食盆菜團，酒樓內的迷你版我都食過，但一大棚人齊齊食盆菜就未試過，可惜，3個小朋友一致通過要BBQ，而陳爸爸亦只好順從民意，今次惟有先一展身手，表演我的拿手絕技——蜜糖烤麵包。
食過無數次的炭燒蜜糖多士，發覺今次炮製的特別好味，原來是蜜糖作怪。陳太話剛才去過養蜂場，在蜂巢內親自𢳂了幾口蜜糖，她說這裏的蜜糖份外芳香清甜，當然啦，百分百新鮮不加人造色素，而我們燒烤用的正是這些蜜糖，難怪我的拿手多士亦特別好味。
食飽飽之後去邊？當然是直奔養蜂場。劈頭就碰上有15年養蜂經驗的鍾先生，他說蜜蜂的針有醫療作用，例如可以醫風濕，不過就要多針幾次才見效，嘩，咪搞！另外食天然蜂蜜更有美容效用，都是這個較中聽！針就免了，要食多幾啖才真哩！
地址：新界錦田水頭村684地段109約
電話：24420909
開放時間：上午10:00至晚上10:00（星期一至日）
交通：於荃灣力生廣場門口乘251M巴士（由青衣機鐵站經荃灣往八鄉），大欖隧道後第二個巴士站落車，再步行約10分鐘，或於元朗市中心乘601綠色專線小巴（由元朗鳳琴街往北圍村）
地址：元朗天水圍沙江圍側
電話：24726848
有乜玩：水上單車、釣魚塘、足底按摩健康徑、燒烤、親子教育及展覽室
地址：元朗流浮山深灣路尖鼻嘴
電話：24726962
有乜玩：觀鳥、參觀養蜂場、魚池
地址：新界錦田水頭村633地段109約
電話：24730738
有乜玩：體驗農莊生活如耕種體驗、陶器製作、燒烤、大自然教室