大市走勢一到關鍵時刻，市場就傳言四起，噚日就話有超級大戶空咗期指，又話中移動（941）個大沽盤重未沽完；至於國企，更加係插到面目全非，隻隻都兩支大陰燭咁落。好明顯，傳言加事實，有心人無非係想個市破關而落。結果係：如願以償。
恒指終於跌穿9000大關，收8962，大跌146點，成交64億元，期指8826，低水136點。大戶除拋售藍籌地產同電訊股外，更「大插插」中資股，唔少國企都散咗。有消息指中國將整理稅收優惠政策，市場擔心會影響國企嘅盈利表現，遂引起拋售潮。其實，中國一路都研究緊統一稅率，日後將會逐步取消稅收優惠，呢啲並唔係新聞，大戶要造淡，借題發揮而已。
中國人大會議期間，日日都會有新措施出台，財政部就強調要嚴格執行有關清理稅收優惠嘅政策，不再允許任何地方部門越權減免稅收。中國稅制複雜，為吸引外來投資，經濟特區有自己的一套，個別省市又有另外一套，以本港上市的國企為例，就有不同的稅率，分別為33%、24%同15%，其中以繳納15%稅率的最多，有30家，而33%的則有約20家。
不過，噚日國企嘅跌勢好全面，唔理有冇「享受」優惠嘅國企，照跌如儀。江西銅（358）跌得最「甘」，低收1.08元，大跌10%，皖通（995）同上海石化（338）都跌7.7%，一拖（038）亦跌7.2%，北京燕化（325）跌7%。
以上舉例嘅5隻國企，前3隻係交緊15%稅，後兩隻則交33%。
中國目前正進行將稅率統一化，一般預期會係統一為25%，因此，無論目前繳納哪種稅率的國企，遲早都會統一，日後亦唔存在任何優惠。當然，目前交緊33%的會受惠，而交緊15%的就會有影響。不過，中國為「照顧」現時享有優惠的國企，相信統一稅率會分階段進行。
國企經呢兩日大跌後，唔少已比早前的高價跌了3成，又可以趁低吸納，由於跌幅大，相信跌勢一定住，反彈亦會幾急。重慶鋼鐵（1053）業績咁靚，𠵱家有成6厘息，預測PE又唔夠4倍，真係買得過。
郭兆誠