港股噚日插水，跌穿9000心理關口，唔少原本炒得好哋哋嘅股仔，都出現腳軟現象。近期好多股仔諗住借小型工業股強勢，趁機配股集資，若市況轉差，基金鬆人，真係空歡喜一場。
好似眼鏡股泰興光學（389）咁，自從早排搞好投資者關係後，成個勢都唔同晒，股價由2.60元水平，一條氣抽上3元樓上。缸湖早有傳聞，公司打算批股集資，而且數目唔細，據經紀陳查探所得，好似抽水成億銀咁多。
泰興受大市氣氛唔好影響，噚日亦跌2.29%，收3.20元，但成交仍有1009萬元。
經紀陳話，泰興一直有位高手護航，相對其他眼鏡股，泰興個場算係最熱鬧，成交亦最活躍，但可惜PE較高。今次泰興配股搞唔搞得成，真係要睇吓呢位高手嘅功力。
另外，創業板股億勝生物科技（8151）近期大上大落。經紀陳話，隻股難玩，不宜亂掂。
慕容小初