娛樂圈真係一個幾有趣嘅地方，當大家認為入黑社會係好out嘅事時，一樣有人要爭住做社團中人。話說最近有兩個娛樂公司老闆級嘅人物，加入咗某社團，正式成為會員，推薦佢兩個入會嘅猛人都係好有份量嘅人，連該社團嘅揸弗人都同佢兩個見面。
新加入社團嗰兩位老闆級人物，其中一個做咗娛樂圈好耐，以前佢亦捧紅過唔少紅星，佢近呢幾年成日同啲社團中人為伴，因為佢一直好想加入社團，唔知係咪因為佢曾經俾社團中人迫得太多，所以佢想搵個有力嘅靠山！
另一個入咗社團嘅娛樂公司老闆級人物，其實好有錢，佢無端端入會，馮仁昭就覺得幾奇怪，因為𠵱家人人北望，有社團背景嘅人都想洗底，佢哋喺呢個時候入會，真係儍儍哋！
日本女星小沢圓日前去咗台灣宣傳，重去咗一間賣酒嘅地方參觀。小沢圓即席品嘗咗高粱酒，佢話覺得入口好好味。小沢圓賣口乖咁話：「如果將來有機會，我好希望做呢間公司嘅代言人。」佢之後重同大家乾杯㖭！
無綫聽日會喺明珠台播映《米高積遜洗冤錄》，節目會有米高前妻對佢同啲仔女嘅剖白，而米高嘅化妝師會講米高啲皮膚由黑掹掹變為白雪雪嘅秘密。
邰正宵噚日到灣仔綵排「創世電視台感恩奉獻典禮」，原來邰正宵專登抽時間嚟香港做活動嘅表演嘉賓，認真畀面。佢早前同鍾景輝拍咗一套福音電影《源來是愛》，邰正宵話喺中學時已經信咗教，佢重話香港有福音片係好事。
袁彩雲最近代替應采兒成為「向日葵美容中心」嘅代言人，簽咗一年合約，有六位數字酬金。袁彩雲噚日喺北角拍廣告硬照，佢好開心咁話：「我瘦咗十磅，𠵱家一百零二磅，最難得係條腰都瘦咗好多，再瘦多幾磅就達到標準。到時我要大量入貨，買啲性感衫，重要攞番以前買落，但又唔敢着嘅三點式泳衣出嚟晒吓身材。」
