港府公布預算案之後，市民怨聲載道，大鬧政府敗家仔。阿虎一算之下，原來政府於97/98年度3月底，財政儲備有4580億元，但預計02/03年度年結時，只剩3030.45億元，到咗03/04年度年結時，更會降至2372億元，即係話阿董上任至04年3月底，香港財政儲備唔見2208億元，相當於100間東方海外（316）總市值，亦等於敗咗每個香港人34萬元，咁敗家都只係被罵兩句，其實着數到不得了。
美股周三雖然反彈，但港股噚日則大跌146點，恒指收報8962，成交64.28億元。ｉ師傅話，主要因為美國可能會在1個禮拜內攻打伊拉克，所以投資者沽貨套現，但估唔到連中石油（857）都被拋售，跌2.44%，收報1.60元，中海油（883）企穩，微升0.92%，收報10.90元。
有傳聞話，中國將重手清理國內地方政府所提供的企業稅務優惠，中資股盈利將受到影響，令到紅籌國企股下挫，江西銅業（358）跌10%，浙江玻璃（739）更跌11%。
國泰（293）業績勁升，但股價竟然飛唔起，出現獲利回吐，噚日下挫3.85%，收11.25元。連帶太古A（019）亦挫3%，收報33.50元。黑客話，先前累積淡倉嘅大戶似乎開始行動，所以公司有盈利支持，亦唔等於股價一定上升，短期大市沽壓會加大，淨係睇吓中移動（941）跌破16元，收報15.60元，成交逾5億元，就知淡友攻勢唔簡單，恒指若能守穩8000已經算好彩。
阿虎