恒指又跌146點，兩件國內電訊股繼續成為是日火種，中移動（941）再跌55仙，聯通（762）又散27.5仙。一個小靈通風波，搞到烏雲蓋頂，兩件電訊股已經好超賣，再追揸相關Put輪風險高；如果博反彈，最好都係直接揸正股，揸Call輪驚住睇錯方向，又因為啲Call輪太過價外，恐怕會喺溢價方面蝕底。
太古派成績表，賺多31%，本應唔錯，奈何派成績表前國泰（293）已經散定先，而大市亦唔掂，太A（019）埋單唔見1元，太ACall輪9475回落24%，收16仙。
9475今年6月杪夠鐘，溢價2.9%，槓桿率20.9倍。正股派末期息90仙，5月中前除息。計埋除息因素，隻輪溢價實際係4.8%，槓桿率20.6倍。太A近排跑贏大市好多，業績雖然出色，都唔易有太大升幅，9475嘅溢價過高，要買嘅話，最好等溢價縮番至考慮。
有兩隻公司輪都升得幾多吓，彩星輪1119收32仙，升幅23%，明年5月到期，溢價6.9%，槓桿率1.8倍，正股（635）由51仙升上58仙帶動，正股炒味濃，業績唔足以支持咁嘅市價，1119槓桿率又低，跟唔過。另1件崇高（209）嘅公司輪134，收10.7仙，升11%，06年底到期，不過槓桿率5.1倍，溢價46.7%，又係過高，追唔過。
章盛