響今屆日內瓦車展上，德國奧迪除展出新版A3外，同場重有NuvolariQuattro概念車而備受車迷注目；就連韓國起亞車廠，亦將旗下最新款Opirus豪華轎車，作全球首度曝光，難怪不少在場參觀人士都駐足細看啦！
記者：鄭達基
除新A3外，奧迪亦展出咗全新NuvolariQuattro概念車，外形設計不但好有未來跑車Feel，就連車廂內部亦好有跑味㖭！而其600匹馬力輸出係源自一台5.0公升V10biturbo引擎，加上扭力輸出數值高達76.5kgm，難怪0至100公里加速僅為4.1秒，極速更可高達250km/h咁快啦！
韓國起亞車廠亦不甘示弱，於會場上展出全新Oprius豪華房車；新車造型甚具氣派，當中四圓頭燈襯以闊大鬼面罩組合，望落重有啲似積架S-Type㖭！引擎配搭方面，廠方為其安排有一台3.5公升引擎作核心，馬力198匹，輔以一套5前速自動波，起步加速強而有勁外，一組歐式懸掛組合，重能夠為你帶來頗高嘅路面循迹性及乘坐舒適性呢！
新版A3車系除造型倍見有吸引力外，襯以同屬新設計嘅頭燈組合，望落真係好型好吸引㗎！另外，廠方亦提供有多個引擎配搭供車迷選擇，如1.6公升（馬力102匹）、2.0公升FSI（馬力150匹）及頂級3.2公升V6（馬力241匹）型號等等，從而令新車有更出色嘅性能表現。
早前被稱為Projet169嘅快意新小車，終於有正式嘅名字——Gingo喇！此車尺碼僅為3540mm×1580mm×1530mm，絕對係現今城市小車嘅標準尺碼。而廠方亦會為其安排有三台引擎供選擇，當中包括有頂級版所配用嘅一台全新1.3公升Multijet型號（馬力70匹），以切合不同用家需要㗎！