第73屆瑞士日內瓦車展，已於日前（3月4日）正式揭幕，會場內有多款新車展出，令在場參觀者有目不暇給之感；而當中最惹人注目嘅，相信會係優皮一族至愛嘅新版平治CLKCabriolet，同埋全新林寶堅尼Gallardo高性能跑車。不如𠵱家一齊嚟先睹為快，睇吓部份於車展會場展出嘅新車啦！
記者：鄭達基
備受車迷注目，兼被視為係優皮一族座駕嘅新版平治CLKCabriolet終於曝光，並會於今年5月正式推出；新車造型雖然望落與現有硬頂型號相近，但改用備有三種顏色選擇嘅電動軟篷頂設計後，明顯造型要來得更吸引。另外，由於車身尺碼較舊有型號有所增加，故此車廂空間亦有裨益，配合上以高級真皮鑲嵌嘅前後兩排座椅，乘坐舒適感亦見不俗呢！廠方亦為新車安排有五台電油引擎供用家選擇，當中頂級跑版CLK55AMGCabriolet，更會用上一台由AMG精心改良嘅5439ccV8引擎，高達367匹嘅馬力輸出，更叫人印象難忘呢！
早在今屆日內瓦車展前，已成為焦點所在嘅林寶堅尼Gallardo，其真身終於正式曝光；呢部全新Gallardo，賣相與同廠Murcielago有幾分相似，但一組頭燈及車尾設計卻予人有耳目一新之感，就連車廂布局亦貫徹有林寶堅尼一向嘅跑車作風㖭！然而，一台5.0公升V10DOHC偈，馬力輸出高達500匹，加上高達52.0kgm嘅強勁扭力輸出，難怪佢可以有頗為強橫嘅性能表現啦！
今屆日內瓦車展上，平治展出咗一部全新、兼配用一台經由AMG精心改良嘅5980ccV12biturbo引擎的CL65AMG高性能跑車；此車除馬力有612ps/4750-5100rpm外，扭力更高達102.0kgm/2000-4000rpm嘅驚人數值。同時，廠方為增強其制動表現，更特別裝上全新設計嘅制動器，除重量較現時使用嘅款式輕出20%外，另外亦可增強制動表現，以達致收放自如嘅效果。車身外貌亦以跑車化為主，你除可憑四輪巨型19吋AMG跑車胎軨辨別其身份外，車身兩旁亦貼有V12Biturbo字樣以資識別。
新款雷諾MeganeⅡCoupe-Cabriolet，亦喺今屆車展會場作首度曝光。新車除仍然保留原有跑車化嘅流線型車體外，另外更特別配用由Karmann設計嘅電摺玻璃頂，從而令車廂變得更開揚；而且只需輕按控制鍵，篷頂便可於22秒內自動開關，用落夠晒方便。車廂空間闊落舒適，就連座椅高度亦較MeganeⅡ降低24mm，輔以闊大擋風玻璃及車窗設計，可有助改善駕駛者視線範圍，增強行車安全性呢！廠方更安排有兩台電油引擎供選擇，當中包括1.6公升（115匹）及2.0公升（136匹）等等，以迎合不同用家需要。
走MPV路線嘅福特FocusC-Max，外形除與同廠Focus車系相近外，掀背式設計亦方便乘客提存儲於尾廂嘅行李；車廂空間又見闊落，而車內座椅更可按需要收摺放平，以增加載物容量，又或者將座椅向前或後移，以增加後排乘客嘅活動空間。新車將會以一台全新1.8公升DuratecHE引擎作核心，馬力輸出為120匹，而且重有運轉寧靜同低耗油量嘅特性㖭！
日本富士車廠展出咗全新B11S概念車，廠方表明佢係一部集跑車化操控、舒適及多功能於一身嘅GranUtilityTurismo車種，除外形流露有極濃厚嘅跑車意識外，車廂裝潢亦同樣吸引；不過最矚目，相信會係一台水平對向六汽缸TwinTurbo偈，所發出嘅400匹馬力輸出及56.1kgm扭力，輔以5前速自動波及AWD系統，性能表現毋庸置疑。
全新雷諾ScenicⅡ擁有全新造型設計，望落份外吸引突出，而車長亦較原有Scenic多出80mm（達4250mm），故此亦可營造出更見闊落嘅車廂空間。車內座椅配搭亦見靈活多變，當遇有需要時可將座椅收摺放平，以增加尾廂載物容量。而闊大擋風玻璃組合，亦能令車上乘客嘅視野範圍變得更廣闊。經強化嘅懸掛系統及車架結構，不但有助增強行車操控性之外，三台分別係1.4公升（98匹）、1.6公升（115匹）及2.0公升（136匹）偈配搭，亦能為你帶來充裕嘅動力輸出呢！