外國賓架老友過往兩年喺倫敦工作，三個月前被炒魷魚，佢話怕要從此退休咯，因為紐約、倫敦滿街失業賓架，邊度重會搵到工吖。好彩佢略有積蓄，被炒之時攞番一筆，仔女已經大晒，呢世人未離過婚，所以唔使憂米飯，特登走番嚟香港一遊，探訪舊朋友。
老外以前在港，有好多美好回憶，更記得「福臨門」啲嘢好食。於是約埋去「福臨門」飲茶，佢問起香港好多時事，好驚奇點解香港人咁唔鍾意董建華，《南華早報》竟然發表社論要董特首退居幕後。左丁山話：「《南早》所言，並不新鮮，好多中文傳媒都有呢種意見。」老外話：「你就知啫，我哋外國人就淨係睇《南華早報》，《南早》叫CH唔好理事，𠵱家全世界都知香港人唔滿意CH。其實CH好好人㗎，我可以做證！」於是佢講古仔，話說佢當年負責船務貸款，兩位船王嘅公司都係佢銀行嘅客戶。某年某月某日，天下大雨，老外企喺文華酒店門口截的士，半個鐘頭都冇的士睬佢（𠵱家就的士排長龍，當年的士唔騷你），董建華架車剛好經過文華，見到老外咁狼狽，叫佢上車，問清楚之後，就同老外講：「我要趕住去酒會，唔可以載你上半山，如果你唔介意，陪佢去到酒會目的地先，跟住我個司機車你上山。」老外當然求之不得，到𠵱家重記住CH係大好人，叫左丁山唔好鬧錯好人！特首為人確係彈者少，讚者多，可惜好人從政，未必能有表現，《南早》叫特首做黨委書記，寓意甚深！