椎名林檎呢位新宿系音樂女王，係我大口羅拉近年最欣賞嘅日本女歌手之一，佢嗰張啱啱登上Oricon第一位嘅新碟《加爾基精液栗之花》，好聽得嚟編曲又夠大膽前衞！而林檎呢排嘅形象亦日日新鮮，令人目不暇給，好似新歌《迷彩》嘅MV，林檎一人分飾古裝淑女、SM惡死歌姬同可愛女侍應三個角色，真係迷彩到飛起！
上次椎名林檎將新歌《莖》拍成四十五分鐘嘅電影，充滿大衛連治（DavidLynch）電影嘅迷離感覺，今次林檎喺《迷彩》嘅MV入面亦有新花臣，布景同美術設計就好有佢嘅偶像導演PeterGreenaway嗰套《情慾色香味》嘅感覺，而喺MV入面幫手演奏嘅樂手，重着晒唐裝、化晒黑眼圈，好似日本漫畫家丸尾末廣筆下嘅漫畫人物咁古怪。
林檎一出場就扮成揸住把遮嘅古裝美女，之後佢化身歌姬，重有大把人服侍，又喺床頭玩SM，重好惡死咁用皮鞭打人，佢又不時分身變成俏侍應周圍走，好鬼過癮！