張栢芝早前因被某周刊的記者跟蹤而報警求助，事後雙方都發出聲明，各執一詞。該周刊昨日就此事作詳細報道，除了指栢芝召四名惡漢到場外，還指她「潑婦罵街」。而栢芝經理人公司的向太，昨日則為此事動肝火，炮轟該周刊。
早前張栢芝和陳小春同遊泰國，被傳媒拍下她穿上三點式幫小春搽太陽油的相片。昨日有周刊指栢芝翻𠝹小春無望，而小春則「𡁻完鬆」。
「係本周刊玩嘢」
對於上述的報道，栢芝經理人公司中國星的向太陳嵐，大動肝火，她昨日接受電話訪問時說：「當時栢芝打畀我，我同在場嘅記者通過電話，啲記者應承我影幾張相就走，點知愈嚟愈多人。啲記者話係老闆叫佢哋做嘅，所以我咪打畀楊受成囉，但佢又話冇咁嘅事，根本就係佢哋本雜誌喺度玩嘢。香港嘅讀者冇咁愚昧，唔會俾呢本雜誌抹黑事實嘅！我呼籲藝人要團結，因為呢本雜誌嘅採訪手法好有問題，唔通間間電影公司都要搞本雜誌，去唱衰同抹黑其他公司嘅藝人？」
對於向太的言論，記者致電楊受成，他表示不會作回應。而《東方新地》編委會昨晚則就此發出聲明，稱並無針對任何藝人，只是如實報道，又指周刊隸屬「新傳媒集團」，完全獨立運作。
小春：我全程被動
栢芝經理人李小姐昨日接受電話訪問時則表示正跟律師商討，對該周刊的報道保留採取法律行動的權利，她說：「栢芝要講嘅嘢，當日喺聲明入面已經講得好清楚，佢哋再拎一兩個字嚟講，根本就係雞蛋裏挑骨頭，冇意思。我都唔明，點解要搵五個大漢去跟蹤一個女藝人？啲保安請佢哋離開佢哋唔肯走又唔寫？」至於栢芝被指𠝹小春失敗，以及小春「𡁻完鬆」，李小姐說：「支筆喺佢哋度，佢哋鍾意點寫就點寫，唔通佢哋次次寫完，我哋都要出嚟回應？」
而小春昨出席尖沙嘴舉行的《蘭香蝶舞笑春風》記者會時，被問及「𡁻完鬆」一事時說：「𡁻完鬆定𡁻完唱先？呢啲字眼我唔識回應。𡁻乜先？魚翅呀？我都鍾意食嘅，不過我屋企冇錢，又唔慣食呢啲嘢，返香港之後我邊有唱啫？全程我都係被動嘅。」
問他可知栢芝和陳冠希同遊日本，小春說：「唔知喎！知我都唔得閒去啦，𠵱家我全程投入工作，要玩出年先玩，𠵱家埋頭苦幹，做緊新唱片。」對於有新女伴，小春說：「嗰個唔係我新女友，我邊有時間識女友，係都要你哋介紹啦。」
讚栢芝郎才女貌
小春又暗寸栢芝假期多，他說：「咁樣做artist，我都想做佢，我一年淨係得新年假期咋！」然後小春又喃喃自語說：「咁咪好咯，郎才女貌（指栢芝和陳冠希）。」
記者問小春可會祝福兩人，他說：「恭喜發財，新年快樂！過咗？咁祝佢哋愚人節or兒童節快樂啦！」記者問他可覺得栢芝花弗，小春一度誤以為記者指他花弗，說：「有女仔就入晒我數，你哋話係我咪係我咯！」當得知記者是講栢芝，小春即說：「咁我又冇深究喎，我又唔係排第八（八卦），亦唔係朝住呢個方向發展。」
採訪：卓美娟
攝影：何國豪
