收到灣仔Amazona的傳單時，講明一個價錢全日任食，當然香港人怕蝕底又怕中計，打電話問清楚先安全，事實證明真係可以由開舖坐到閂舖。至於質素方面，打聽到大廚曾在前會展自助餐廳當廚，先發覺原來真係有咁筍！
記者：邵超
攝影：陳智良
度出畀客人食足全日呢個噱頭，都是拜市道不景所賜。Amazona前身是的士高，隨着競爭激烈，急謀轉型，老闆Mark想到如果有一個地方可以讓人坐足全日，任傾任食，飲品免費無限供應，重可以包場任玩，喺三月份更低至每位$68，在灣仔區仍有利可圖。
Mark算是鑽石王老五，擁有三間餐廳，不過姻緣運就差少少，遇上兩個走路新娘，百思不得其解之下，索性繼續同香港的女性朋友傾吓心事，但既然愛情無着落，事業運應該上升。Mark有句口頭禪「goodvalueformoney」，將心比己，他雖然定咗$88（採訪當日仍是$88），但係絕對要畀顧客有物超所值的感覺。
Mark口口聲聲話$88有幾抵，現場所見自助餐款式多過傳單上的八十八款，起碼超過一百款，拉來大廚Daniel問Amazona這樣的出品會不會賠本，他話見工時Mark已經講明唔係要豬皮、魚蛋呢類貨色，一定要係酒店水準。
「無客嗰陣時，我哋會收起一啲容易風乾或海鮮類嘅食物，保持新鮮同衞生。總之有客嚟就一定有新鮮嘅嘢食。」海鮮拼盤上有智利生蠔、新西蘭青口、花蟹等，按季節供應，而且有兩位酒店級師傅Daniel同Tong主理大部份食物，絕對唔係一般$88的水準。然而餐廳仍有利可圖。
「我哋唔係收二百幾蚊一位，人客當然唔可以要求太高，我哋嘅定位係平價，但要有中等以上嘅質素，同埋可以食足十四個鐘。」現時Amazona重新開業不足一個月，不時會有意想不到的折扣優惠，三月份更會大割價$68，仍然提供一樣的高水準食物，絕對係心動價。
魚肉裏裏外外被刁草的香味包圍，同一般煙三文魚的味道比較貴格好多，係食自助餐回本的必然之選。
煙鴨胸唔一定配紅酒汁一樣咁好，好似Amazona用牛油藍草莓汁令呢味煙鴨胸生色不少，燒鴨胸肉嫩多汁，好好味呀！
除咗有招牌豆腐花，可以試埋甜品大廚Tong的手勢，全部跟足酒店小型尺寸，唔係一味甜到你飽的貨色。
雖則只賣$68，但食物質素絕對是酒店級數，皆因幕後的四大天王都有「背景」。
1.薄利多銷，只要不斷有客到，即使出貴價貨都有賺。
2.多自製食品，減少向供應商取貨，減低成本。
3.好少人可以有時間坐成日，就算有，食量亦有限。
VS
1.下晝十二至三點同晚上七至十點客人最多，係更換全批食物的時段，最新鮮。
2.食物不乏貴價食品如智利生蠔、新西蘭青口、花蟹、鴨胸等，是回本的必然選擇。
3.貼近廚房有兩張七人枱，一見到廚師出場，可以最快速度攞嘢食。
Amazona
地址：灣仔駱克道81-85號霸田商業中心二樓
電話：25202049
營業時間：11:30am-1:00am