電腦雜誌記者Joe，九歲開始打機，一直都貪快，只買新Game。一年前覺悟，「打機唔同買電話PDA，使乜追新款，動輒就三百，最衰係出咗一個月就起碼跌$50（勁Hit除外），開始改變即日排隊買新Game嘅習慣。」直到半年前，更發現：「離譜！原來二手Game出版一個月就可以平近半，唔覺意搵到有少少花，重可再壓價十蚊！」如此震撼的經歷，令他立即成為二手Game的追隨者。
記者：梁佩芬 攝影：陳盛臣、周旭文
Joe最鍾意玩賽車Game，所以買二手Game，一定要Check有無Menu，「試過買咗隻碟返去，原來Menu中間無咗兩頁，好在都無太大問題，不過以後次次都逐頁掀，睇吓齊唔齊！」至於放Game，就不太踴躍：「Game無保值能力，尤其Playstation系列，新貨二手通街都有，個價一定壓到得番一、兩成，寧願儲起佢，同Friend交換好過。」喺呢半年，大大話話都買二十幾隻二手Game，粗略計過，每隻都慳到百五蚊，加埋就三千有多，不禁自讚一番：「絕對係明智之選！」。
黃金「高達」阿駿有此經驗：「好似嗰隻《魯邦》，舖頭賣咗三日，自己都未開始玩，居然晨早開舖，就有人攞嚟放！」佢以為個人勁等錢使至嚟放Game，原來：「嗰Game好易爆機，之後又無得繼續玩落去，機迷就梗係唔鍾意，放咗攞番百拎蚊都好呀！」通常一啲ActionGame就最多人放，其次係RPG，再者係賽車，最少人放係足球Game，因可自創Player，好花時間，同埋無得打爆機，除非覺得唔啱玩，否則都好難有二手。
灣仔188DreamstoreEdwin話：「XBOX美版Game貨又少，價又貴，最慘係有啲Game唔多好玩。」回收價如何？「收Game要睇兩方面，一係口啤，一出就斷市收得實貴啲，係原價六成左右，好似GC隻《足球小將》，𠵱家重收緊五成；二係年期，愈新愈貴就必然，推出少過一個禮拜就收八成，之後就四至五成不等。」不過，有啲新Game一出就係跳樓貨，唔到一個月就跌價一半，通常只收一成。
話自己唔靚仔，不肯出鏡的Sam，喺皆旺開檔都三、四年，初初只係賣玩具二手遊戲機，後來客人問買Game重多，演變今日專賣懷舊Game舖頭。「喺任天堂紅白機年代，一餅Game都百多二百，喺十幾年前絕對係奢侈品。今時今日，一部玩得但殘到爆的任天堂只值一百蚊，但嗰啲帶就要幾百；90年代初嘅MSX2機，二手機都絕迹埋，但買帶就過千蚊餅。」
a）Dreamstore（25753285）
地址：灣仔東方188商場256舖
b）高達公司（23861986）
地址：深水埗黃金商場地下13B-17A
c）OhGame（90129271）
地址：旺角皆旺商場地庫B36