呢個世界就係咁，有錢使得鬼推磨，凱沙羅頓可以喺禮拜二場德國盃四強賽大勝雲達不來梅三球入決賽，講到尾都係錢作怪。
負債超過三千萬歐元（約二億五千萬港元）嘅凱沙羅頓入咗決賽後，淨係電視直播同門券就有過百萬歐元落袋，數目雖然唔大，但係對佢哋都幾有幫助。重有就係如果可以喺決賽對拜仁（拜仁尋晚同利華古遜爭入決賽，截稿前未知戰果），咁佢哋就多咗條財路，事關拜仁𠵱家喺聯賽榜有十分領前優勢，下屆幾可肯定有份打歐冠盃，咁即係話凱沙羅頓就算喺決賽輸咗，下屆都可以踢歐洲足協盃。
講開又講，下個禮拜四會喺歐洲足協盃同利物浦爭四強嘅些路迪，佢哋高層話如果攞到出線權，就向有份出力嘅球員發放四萬鎊（約四十八萬港元）獎金。雖則利物浦喺攞咗聯賽盃後士氣大振，而實力又贏些路迪少少，但所謂「重賞之下必有勇夫」，咪話我求大俠唔提醒大家，如果見利記要作客讓波或者主場讓得太多嘅話，就要三思啦！
俄羅斯冰棍球員費特洛夫日前爆料，話前年同古妮高娃有過一段短暫嘅婚姻，第二日呢位網壇大美人即刻喺自己個網站澄清自己冇結婚，但佢嘅英文係用現在式（Iamnotmarried），即係話𠵱家係單身，但冇否認有冇結過婚。我求大俠認為大美人想用「捉字蝨」死撐同掩飾，如果唔係就用「從未」（Never）呢個字喇！
曼聯硬漢堅尼近日話想退休後留喺曼聯教波喎；不過咪話我求大俠潑佢冷水，曼聯好少搵番自己球員教波；再講，曼聯球員出身退休後教波嘅白賴仁笠臣、布魯士同埋史特根都發展得麻麻。計我話堅尼不如學吓簡東拿咁，退休後拍吓戲或者踢吓沙灘波。
國足邵佳一自稱好有信心喺慕尼黑1860穩佔正選，因為佢已經慢慢適應德國嘅生活。查實佢之所以能夠適應德國生活，固然要多謝佢嗰位德文老師，但原來重要多謝佢嘅克羅地亞籍隊友蘇加。此話何解？因為蘇加去過好多個國家搵食，熟多國語言，又肯將啲經驗同邵仔分享，都算唔話得。
影壇有個萬人迷里安納度狄卡比奧，AC米蘭亦有一個魅力非凡嘅李安納度。喺聖保羅愈嚟愈吃香嘅巴西國腳中場卡卡，一方面話自己未定去向，但同時話好有興趣加盟AC，想同前輩李安納度共事咁話喎。AC可能因為李安納度而簽得心頭好，就證明當日搵佢番嚟唔只做慈善工作咁簡單，真係有實際作用㗎。
逢周一至周五見報