原本正喺墨西哥開會嘅李國寶，噚日坐咗二十幾個鐘頭飛機一早返香港，聽吓阿松講乜。佢讚阿松嘅演詞「Short,sweetandtothepoint」，即係簡短精美喎。
但令寶哥哥更加興奮嘅，係佢喺墨西哥開會見到老布殊，呢位前總統話佢位公子好有決心鏟除侯賽因，怕且呢次都實打得成仗，而同場嘅新加坡資政李光耀，重全力支持美國佬開戰。老布殊出年八十大壽，寶哥哥話老布殊邀請佢一齊跳降落傘。老布殊以前做過空軍，七十五大壽嗰陣跳過，嚇到佢太太死死吓。原來寶哥哥都有飛機牌，後生個陣亦跳過傘，但之後就頭暈轉向。雖然𠵱家佢隻腳未好番晒，但佢話前總統請到，一定奉陪到底。
傳真︰2623-9278
電郵︰